Türkmenistanyň Prezidenti ýurdumyzyň Ministrler Kabinetiniň Başlygynyň orunbasary, daşary işler ministri Raşid Meredow bilen sanly ulgam arkaly iş maslahatyny geçirdi. “Watan” habarlar gepleşiginde bellenilip geçilişi ýaly, iş maslahatynda Türkmenistanyň wekiliýetiniň şu ýylyň 18-20-nji dekabrynda Hindistan Respublikasyna hem-de Pakistan Yslam Respublikasyna amala aşyran saparlarynyň netijeleri boýunça hasabat berildi.
Wise-premýer Türkmenistanyň wekiliýetiniň Hindistan Respublikasynda hem-de Pakistan Yslam Respublikasynda birnäçe halkara duşuşyklara gatnaşyp, möhüm gepleşikler geçirendikleri barada belläp geçdi.
Türkmenistanyň daşary syýasat edarasynyň ýolbaşçysy wekiliýetiň Nýu-Delide geçen «Merkezi Aziýa-Hindistan» Dialogynyň Daşary işler ministrleriniň nobatdaky üçünji duşuşygyna gatnaşmagynyň jemlerini beýan etdi. Dialogyň çäklerinde bu Düzümiň guramaçylyk gurluşyny ösdürmegiň mümkinçiliklerine, şol sanda ýurtlaryň arasyndaky söwda-ykdysady hyzmatdaşlygyny giňeltmegiň meselelerine seredilip geçildi.
Şeýle hem bu saparyň çäklerinde hökümet wekiliýetiniň ýolbaşçysynyň Hindistanyň Premýer-ministri Narendra Modi we daşary işler ministri Subrahmaniýam Jaýşankar bilen geçirilen gepleşikleriniň netijeleri hem beýan edildi.
Bu duşuşykda Türkmenistan-Owganystan-Pakistan-Hindistan gaz geçirijisiniň taslamasyny amala aşyrmak üçin ikitaraplaýyn türkmen-hindi pudagara iş toparyny döretmek hem-de bu taslamanyň dolandyryjy komitetiniň nobatdaky mejlisini geçirmek baradaky başlangyçlar beýan edildi.
Wise-premýer Pakistana saparynyň çäklerinde bu ýurduň Prezidenti Arif Alwi hem daşary işler ministri Mahmud Şah Kureýşi bilen duşuşyklaryň geçirilendigi, Türkmenistan-Owganystan-Pakistan-Hindistan gaz geçirijisiniň hem-de Türkmenistan-Owganystan-Pakistan elektrik geçirijisi ulgamyny amala aşyrmak duşuşygyň esasy meseleleri bolandygyny belledi.
Pakistan tarapy bilen Türkmenistan-Owganystan-Pakistan-Hindistan gaz geçirijisiniň taslamasyny amala aşyrmak üçin ikitaraplaýyn türkmen-pakistan pudagara toparyny döretmek bilen bagly başlangyçlar beýan edildi.
23-nji dekabr ýyldyzlar näme diýýär? Gündelik Täleýnama