Sportuň boks görnüşi boýunça ussatlyk derejä ýeten Maýk Taýson 15 ýyl soňra ringlere gaýtadan gaýdyp gelýär. 54 ýaşyndaky amerikan boksçysy Maýk Taýson şu ýylyň sentýabr aýynyň 12-sine 51 ýaşyndaky boksçy Roý Jons bilen duşuşyk geçirer.
ABŞ-nyň Kaliforniýa ştatynda geçiriljek duşuşyk 8 raunddan ybarat bolar. Amerikaly meşhur boksçy öz kariýerasynda iň soňky gezek 2005-nji ýylda Kewin Mak Braýd bilen duşuşypdy.
Bu duşuşyga boks janköýerleri sabyrsyzlyk bilen garaşýar.
Maýk Taýson 1966-njy ýylda doglan. Ol 1985-2005-nji ýyllar aralygy boks äleminde üstünlikli çykyş edip, uly üstünliklere ýeten türgenleriň sanawynda ilkinjileriň hatarynda tanalýar. Ol öz kariýerasynda 58 gezek duşuşyga gatnaşyp, 50 gezek ýeňiş gazanmagy başardy.