Türkmenistanyň ähli orta mekdeplerinde 25-nji maýda «Garaşsyz, baky Bitarap Türkmenistan — bedew batly at-myradyň mekany» şygary bilen «Soňky jaň» dabaralary geçiriler. Göreldeli uçurymlara hem-de kärine ussat bilim işgärlerine Türkmenistanyň Prezidentiniň adyndan ýadygärlik sowgatlar gowşurylar.
Baýramçylyk güni uçurymlaryň Aşgabat we Arkadag şäherleriniň, welaýatlaryň gözel ýerlerine, medeni-dynç alyş merkezlerine gezelençlerini guramak meýilleşdirilýär. Şeýle hem, baýramçylyk güni medeniýet we sungat ussatlarynyň konsertleriniň geçirilmegi göz öňünde tutulýar.
Bu barada sanly ulgam arkaly geçirilen Ministrler Kabinetiniň nobatdaky mejlisinde wise-premýer B.Mämmedowyň hasabatynda bellenildi hem-de Türkmenistanyň Prezidentiniň garamagyna degişli teklipler hödürlenildi.
Türkmenistanyň Prezidenti hasabaty diňläp, wise-premýere okuw ýylynyň tamamlanmagy şeýle-de Aşgabat şäheriniň güni mynasybetli mekdepleriň uçurymlarynyň gatnaşmaklarynda «Soňky jaň» dabaralaryny ýokary derejede geçirmegi tabşyrdy.