Şu günler Russiýanyň uniwersitetleri Aşgabatda geçirilýän «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergisine gatnaşýarlar.
Aşgabatdaky Rus öýüniň habar bermegine görä, 12-nji oktýabra çenli dowam edýän halkara sergä Russiýanyň dürli sebitlerinden 20 sany uniwersitet gatnaşýar. Sergä gatnaşyjylar bu uniwersitetleriň bilim maksatnamalary, Russiýada bilim almak mümkinçiligi barada maglumat alyp bilerler.
Milli barlag ýadro uniwersitetiniň wekili Waleriýa Butko TASS habarlar gullugynyň habarçysyna beren beýanatynda Türkmenistandaky sergä ilkinji gezek gatnaşýandyklaryny belläp, Türkmenistandan ýaşlary öz ýokary bilim edarasyna magistratura we aspirantura okamaga çagyrdy. Ol öz ýokary okuw mekdebiniň lukmançylyk fizika ugry boýunça hünärmenler taýýarlaýandygyny aýdyp, munuň onkologiýa kesellerini bejermek üçin giň mümkinçilik döredýändigini belledi.
Russiýanyň Tehnologiýa uniwersitetiniň wekili Ýelena Slezkina bolsa, wekilçilik edýän rus uniwersitetinde 900-e golaý türkmen talyplarynyň bilim alýandygyny belledi. Ol IT-tehnologiýa, emeli aň, nanotehnologiýa, himiýa, biotehnologiýa ýaly ugurlarda hünärmenler taýýarlaýandyklaryny aýtdy.