Gündogaryň beýik şahyry we akyldary Magtymguly Pyragynyň doglan gününiň 300 ýyllygyny bellemegiň çäklerinde, Türkmenistanyň BMG-niň Ženewadaky edarasynyň ýanyndaky hemişelik wekilhanasy tarapyndan Ženewadaky Milletleriň köşgüniň binasynda Magtymgulynyň ömri we döredijiligi barada giňişleýin maglumat berýän QR kod ýerleşdirilen ýörite banner oturdyldy.
Mälim bolşy ýaly, şu ýylyň 26-njy fewralynda Adam hukuklary boýunça Geňeşiň 55-nji sessiýasy agzalan banneriň oturdylan binasynda öz işine başlady. Bu çäräniň işine BMG-niň Baş sekretary A.Guterriş, BMG-niň Baş Assambleýasynyň Prezidenti D.Frensis, şeýle hem dünýäniň dürli künjeklerinden wise-prezidentler, wise-premýerler, ministrler we beýleki resmi wekilleriň derejesinde 125-den gowrak wekiliýet gatnaşýar.
Hemişelik wekilhana tarapyndan gurnalan maglumat stendiniň bu çärä gatnaşýan daşary ýurt wekilleriniň arasynda uly gyzyklanma eýe bolandygyny bellemek gerek.