Hytaý Halk Respublikasynyň ilaty 2,08 million adam azalyp, 1,40867 milliard adama deň boldy. Bu barada ýurduň Baş statistika müdirligi habar berýär.
Berlen maglumata görä, geçen ýyl Hytaýda täze doglan bäbekleriň 9,02 milliony hasaba alyndy. Hasabat döwründe 11,1 million adam aradan çykdy.
Hytaýyň erkek ilatynyň sany 720,32 million adama deň boldy. Zenanlaryň sany bolssa, 689,35 milliona deňdir. Ilatyň ýaş düzümi barada aýdylanda bolsa, zähmete ukyply ilatyň sany (16-59 ýaş) 864,81 million adama deň bolup, ol hem Hytaýyň ilatynyň 61,3 göterimine deňdir.
Hytaýyň 60 ýaşdan uly bolan ilatynyň sany 296,97 milliona barabardyr.
2023-nji ýylda ýurduň şäher ilaty 11,96 million köpelip, 932,67 million adama deňdir. Oba ýerlerinde 477 million adam ýaşaýar.