2025-nji ýylyň 3-nji maýynda Konstansa şäheriniň Teçirgöl obasynda Türkmenistanyň ilçihanasy Rumyniýanyň Medeniýet ministrliginiň goldawy bilen we Rumyniýanyň ÝUNESKO işleri boýunça Milli komissiýasynyň howandarlygynda geçirilen “Hydyrlez” festiwalyna gatnaşdy.
Baýramçylyk maksatnamasynyň çäginde sergi-ýarmarkanyň dabaraly açylyşy boldy. Çäräniň guramaçylary gutlag sözleri bilen çykyş etdiler. Festiwalda ÝUNESKO-nyň Maddy däl medeni mirasynyň sanawyna girizilen 5 sany milli oýun we sport görnüşi görkezildi. Myhmanlara milli tagamlar, milli saz we tans çykyşlary, şeýle-de gatnaşyjy ýurtlaryň wekilleri tarapyndan döredijilik we el hünärleri boýunça ussatlyk sapaklary hödürlenildi.
Çykyş edenler Hydyrlez festiwalynyň tebigatyň täzeden janlanmagynyň we jemgyýetçilik sazlaşygynyň nyşany hökmünde türki medeni däplerindäki ornunyň uludygyny, şeýle hem bu baýramçylygyň ÝUNESKO tarapyndan adamzadyň maddy däl medeni mirasy hökmünde ykrar edilmeginiň ähmiýetini belläp geçdiler. Ýaş nesli terbiýelemek, olaryň medeni däpleri saklamak işine gatnaşygyny üpjün etmek meselelerine aýratyn üns berildi.
Myhmanlaryň ünsüni, gatnaşýan ýurtlaryň medeni mirasyna bagyşlanan ak öýleriniň içindäki milli sergiler aýratyn çekdi. Türkmenistanyň ilçihanasynyň ak öýünde türkmen halylary, milli lybaslar, türkmen zenanlarynyň tiken el işleri we nagyşlar, şaý-sepler, saz gurallary we Türkmenistany tanyşdyrýan reňkli suratlar görkezildi. Şeýle hem myhmanlar Türkmenistanyň Prezidenti Serdar Berdimuhamedow, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow tarapyndan ýazylan ylmy eserler bilen we Türkmenistana degişli beýleki neşirler bilen tanyşmaga mümkinçilik aldylar.
Türkmenistanyň Rumyniýadaky Ilçihanasynyň gatnaşmagy, şol sanda medeni diwarlygynyň üstünlikli işi Türkmenistanyň medeni diplomatiýasynyň maksatlaryny öňe sürmekde uly goşant boldy. Bu çäre ýerli we halkara gatnaşyjylar bilen netijeli hyzmatdaşlyga we ikitaraplaýyn medeni gatnaşyklaryň berkemegine ýardam etdi.