«Forbes» Žurnalyna görä, Germaniýanyň kansleri Angela Merkel tamamlanyp barýan ýylda dünýäniň iň başarjaň zenanydyr. Ýeri gelende aýtsak, neşir ýylyň başarjaň zenanlarynyň 100-sinden düzülen sanawyny yglan etdi.
Sanawyň ikinji ornunda Ýewropanyň Merkezi bankynyň prezidenti Kristina Lagard bar. Ol bu banka ýolbaçy bolan ilkinji zenan maşgaladyr. K.Lagard mundan ozal sekiz ýylyň dowamynda Halkara walýuta fondunyň ýolbaşçysy wezipesinde işläpdi.
Ýeri gelende aýtsak, ilkinji 100-lüge girýän zenanlaryň 31-si biznes, 17-si tehnologiýa, 12-si maliýe, 14-si medeni ugurlar, 22-si syýasat, 4-si adamlara ýardam bermek boýunça iş alyp barýar.
Sanawa girizilen zenanlar 32 döwlete wekilçilik edýär. Olaryň iň ýaşy ýakynda «TIME» Žurnaly tarapyndan «Ýylyň adamy» diýlip saýlanylan Greta Týunbergdir. Onuň ady sanawyň 100-nji basgançagynda görkezildi. Bu sanawyň iň ýaşuly wekili ― Beýik Britaniýanyň şazenany Ýelizawetta II 40-njy orny eýeleýär.
Agzalan sanawyň ilkinji onlugynda Angela Merkel bilen Kristina Lagarddan başga-da, ABŞ-nyň Kongresiniň Wekiller palatasynyň başlygy Nensi Pelosi, ÝB-niň prezidenti Ursula won der Lin, «General Motors» kompaniýasynyň ýolbaşçysy Meri Barra, «Bill and Melinda Gates Foundation» haýyr-sahawat gaznasynyň esaslandyryjylarynyň biri Melinda Geýts, amerikaly milliarder Ebigel Jonson, ispaniýaly bankçy Ana Botin, amerikaly işewür Jinni Rometti we «Lockheed Martin» korporasiýasynyň prezidenti Merilin Hýuson bar.