Türkmenistanyň Döwlet gümrük gullugynyň başlygy Aşgabada sapar bilen gelen Bütindünýä gümrük guramasynyň Baş sekretary jenap Kunio Mikuriýa bilen duşuşdy.
Duşuşygyň başynda Gullugyň başlygy mähirli garşylap, Türkmenistanyň Garaşsyzlygynyň şanly 32 ýyl baýramy mynasybetli dabaralara gatnaşmak barada çakylygy kabul edip, gelendigi üçin hormatly myhmana minnetdarlyk bildirdi. Öz gezeginde jenap Kunio Mikuriýa Gullugyň başlygyny we ähli şahsy düzümi Türkmenistanyň Garaşsyzlygynyň 32 ýyllygy hem-de Türkmenistanyň Bütindünýä gümrük guramasynyň agzalygyna kabul edilmeginiň 30 ýyllygy bilen tüýs ýürekden gutlady.
Söhbetdeşligiň barşynda, Türkmenistanyň Döwlet gümrük gullugy bilen Bütindünýä gümrük guramasynyň arasynda gazanylan özara gatnaşyklaryň derejesi barada pikir alyşyp, taraplar ikitaraplaýyn hyzmatdaşlygyň oňyn ösüşini bellediler. Soňky iki ýylda Türkmenistan 4 sany gümrük konwensiýasynyň agzasy boldy. Şeýle-de, Ýaponiýanyň gümrük edarasy tarapyndan maliýleşdirilýän Guramanyň 2023-2024-nji ýyl üçin hünär ösüş maksatnamasyna Gullugyň işgäriniň birnäçe ýurtdan dalaşgärleriň içinden saýlanylmagy kanagatlanma bilen bellendi.
Soňra Döwlet gümrük gullugynyň merkezi edarasyna gelmeginiň çäginde, Baş sekretar gümrük gullugynyň alyp barýan işi, bu ýerde işiň guralyşy, döredilen mümkinçilikler bilen giňden tanyşdy. Ol binada ýerleşýän iş otaglara, mejlisler zalyna, kitaphanana baryp gördi. Binanyň birinji gatynda ýerleşýän seljeriş merkezinde uly monitorda myhmana Türkmenistanda gümrük ulgamynyň guralyşyny we aýratynlyklary beýan edilýän wideo ýazgy görkezildi.
Jenap Kunio Mikuriýa, şeýle hem, Gullugyň muzeý otagyna baryp, Türkmenistanda gümrük gullugynyň döredilmeginiň we ösüşiniň taryhy bilen tanyşdy hem-de Hormatly myhmanlar kitabynda ýadygärlik ýazgy galdyrdy.