Russiýa Federasiýasynyň Sankt-Peterburg şäheriniň gubernatory Aleksandr Beglow Aşgabada amala aşyran resmi saparynyň çäklerinde Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow bilen duşuşdy. Bu barada Sankt-Peterburg şäheriniň administrasiýasy habar berýär.
– Sankt-Peterburg şäheriniň ýolbaşçy düzümi Türkmenistan bilen hyzmatdaşlyk gatnaşyklaryna ýokary baha berýär. Bu gatnaşyklary ösdürmek daşary ykdysady we halkara işiniň esasy ugry bolmagynda galýar – diýip, şäheriň gubernatory belleýär.
Onuň bellemegine görä, Peterburg bilen Türkmenistanyň arasyndaky gatnaşyklar täze derejelere çykdy. Gubernator Türkmenistan bilen söwda-ykdysady hyzmatdaşlygy üçin ägirt uly mümkinçilikleriň bardygyny belledi.
Şunuň bilen baglylykda, Beglow Türkmenistanyň Sankt-Peterburgda söwda öýüni, Sankt-Peterburguň Türkmenistanda söwda öýüni açmagy teklip etdi. Şeýle hem ol ýerli söwda torlary bilen türkmen önümleriniň rus bazarynda tanyşdyryş işlerini guramaga taýýardygyny belledi.
Şeýle hem 2022-nji ýylyň oktýabrynda GDA-nyň Baştutanlarynyň resmi däl duşuşygynyň çäklerinde gazanylan ylalaşyga laýyklykda, Türkmenistan-Sankt-Peterburg işewürler forumyny guramak meselesi ara alyp maslahatlaşyldy.