Türkmen döwlet bedenterbiýe we sport institutynyň 5-nji ýyl talyby Bägül Berdiýewa agyr atletika boýunça dünýä çempionatynda çykyş edip, zenanlaryň arasynda 49 kilograma çenli agram derejesinde ilkinji ýedilige girmegi başardy.
Silterlemekde bäşinji
Başga bir ildeşimiz Ýulduz Jumabaýewa bilen bir agram derejesinde, bir toparçada bäsleşen Bägül ştangany silterläp götermek boýunça 74 kilogramlyk netije görkezdi. Ol ilkinji synanyşygynda bu agyrlygy eýgerip bilmedi, ikinji synanyşykda bolsa agramyň hötdesinden geldi. Üçünji synanyşygynda 77 kilogram agyrlygy buýran Bägül bu gezek hem ony göterip bilmedi. Şeýlelikde, ol ştandany silterläp galdyrmak boýunça netijesini 74 kilogram agyrlyk bilen tamamlady.
Bägül Berdiýewa 13 türgeniň ýaryşan agram derejesinde silterläp galdyrmakda ilkinji bäşlige girdi. Bu görnüşde iň ýokary netijäni tailandly türgen Kambao Suroçana görkezdi. Ol 86 kilogram agyrlygy başynyň üstüne göterdi. Ikinji orny eýelän ýaponiýaly agyr atletikaçy Riza Suzuki 78 kilogramlyk agyrlygy eýgerdi. Bu görnüşde üçünji orny ildeşimiz Ýulduz Jumabaýewanyň eýeländigini habar beripdik. Ol silterläp götermek boýunça ýaryşy 76 kilogramlyk netije bilen tamamlady.
Bägül Berdiýewa indoneziýaly türgen Siti Nafisatuh Harirohdan 1 kilogram az göterdi. Onuň bu görnüşde filippinli, ispaniýaly, hindistanly we özbegistanly garşydaşlaryndan has gowy netije görkezendigini aýtmak gerek.
Itekläp galdyrmakda sekizinji
Bägül Berdiýewa ştangany galdyrmagyň ikinji görnüşi ― itekläp galdyrmak boýunça ilkinji synanyşygynda 92 kilogram agyrlygy buýurdy we ony ýeňillik bilen galdyrdy. Ýöne ol ikinji we üçünji gezeklerde 95 kilogramlyk agyrlygy göterip bilmedi.
Bu gezek sekizinji orny eýelän Bägül jemi 166 kilogramlyk netije bilen ýaryşyň ýedinji ornundan özüne ýer tapdy. Biziň ildeşimiz filippinli türgen Elien Perez bilen deň netije görkezdi, hindistanly Jilli Dalabeharadan bolsa bir kilogram yza galdy.
Bägül Berdiýewa kim?
Geljek ýylda Türkmen döwlet bedenterbiýe we sport institutynyň uçurymy boljak Bägül ozal Yslam Raýdaşlyk oýunlaryna, Aşgabatda we beýleki döwletlerde geçirilen Aziýa çempionatlarynda, Ýapyk binalarda we söweş sungaty boýunça V Aziýa oýunlaryna gatnaşdy.
Türkmenistanyň Prezidenti Germaniýanyň Federal Kanslerini gutlady