ARKADAG ŞÄHERI – YLHAM
ARKADAG ŞÄHERI
Gadym Oguzyň ýurt tutunan topragy,
Bu gün täze şäher bolup galkynýar.
Arkadag şäheri – sungat şäheri,
Arkadag şäheri – ýaşlaň şäheri,
Ýaşlar bagtyýar.
Ertirlere gadam urýar bu Watan,
Güýç-kuwwaty, ynam-ygrary bilen.
Döwrüň geljeginde çuň maksat guran,
Arkadag Serdarly ýaşlary bilen.
Nesillere bolan bu synmaz ynam,
Geljek üçin maksat gurýar,
Döwlet gurýar,
Gurýar şäher…
Eý, Hakdan ykbaly çüwen türkmen,
Guwan…
Ýüze sylyp, bu asuda säheri.
Seňiň beýik Ogluň adyn göterýär,
ARKADAG ŞÄHERI!
GALKYNYŞ ŞÄHERI – BAGT ŞÄHERI
Watan asla unutmaýar halkyna
Bütin ömür bilim beren adamy
Bagtyýar il baky saklar aňynda
Berdimuhammet Annaýewiň adyny,
Halkara atçylyk akademýasy,
Ussat seýis, Aba Annaýew adynda.
Zehinli zähmeti, yhlasy bardyr,
Ahalteke bedewleriň badynda .
Lukmançylyk ylymlaryň doktory
Ol bir beýik, zenan şahsyýet bolan
Bu gün orta hünär okuw mekdebi
Saçly Dursunowaň adyny alan.
At üstünde edermendir ýigitler,
Gerçekleň ganatly Gyraty bardyr.
Şäheriň atçylyk döwlet sirkinde
Göroglyň egsilmez gaýraty bardyr.
Kitap – ummanydyr pähim-paýhasyň,
Kitaphana ummanlaryň dünýäsi.
Ady bilen Döwletmämmet Azadyň,
Guruldy şäheriň kitaphanasy.
Türkmen teatrynyň düýbüni tutan,
Beýikler sungata arka bolup dur,
Döwlet drama teatry, şäheriň,
Aman Gulmämmede sarpa bolup dur.
Halk bagşysy, ussat Sahy Jepbaryň.
Adyn goýup ýörite sungat mekdebe,
Peder ýoly bilen dowam bolup dur
Bu Watanda ägirtlere mertebe.
Tarypyny gara gazma ýetirer,
«Şükür bagşy» sazyň gudrat mekdebi
Bu gün buýsanç bilen adyn göterer
Şäheriň çagalar sungat mekdebi
Nesilleriň howandary, hossary,
Halkyň Peder ogly hem Arkadagy.
Bu gün adyn buýsanç bilen göterýär
Çagalar saladyş merkeziň ady.
Belent sungat binasynda türkmeniň
Beýik Ogly Arkadagyň ady bar.
Onuň bilen Watan-bagtyň mekany,
Türkmen halky bu gün baky bagtyýar.
Arkadagly, Arkadagly Serdarly,
Bu Watanda ägirtler bar gör, niçe,
Halkyň ykbalyny gerdene alan,
Peder ýoly dowamatdyr geljege.
Yklymda ilkinji akylly şäher,
Ykrarnamasydyr täze eýýamyň.
Behişde öwrülen mekany görmek,
Arzuwna öwrülmiş bütin dünýäniň.
Külli türkmenimiň, milli Lideri,
Sagbolun, Gahryman Arkadagymyz.
Peder paýhasyndan bina eýlenen,
Galkynyş şäheri,
Bagt şäheri,
Geljegiň nusgalyk sungat şäheri,
Gutly bolsun, Arkadagly Serdarymyz.
Kerim ATÇAPANOW
Türkmen döwlet medeniýet institutynyň talyby