Sankt-Peterburgyň gubernatory Aleksandr Beglow we onuň ýanynda bolýan wekiliýet agzalary Türkmenistana saparynyň çäklerinde Arkadag şäherine baryp gördüler. Şäher häkimliginde russiýaly hyzmatdaşlaryň täze şäheriň ýolbaşçylary bilen duşuşygy geçirildi. Iki şäheriň arasynda dostluk gatnaşyklaryny ýola goýmagyň mümkinçilikleri barada pikir alşyldy. Bu barada Halkara habarlar merkezi habar berýär.
Duşuşygyň jemleri boýunça Arkadag şäheriniň häkimligi bilen Sankt-Peterburgyň hökümetiniň arasynda söwda-ykdysady, ylmy-tehniki we ynsanperwer babatda hyzmatdaşlyk etmek hakynda Ylalaşyga we Arkadag şäheriniň häkimligi bilen Sankt-Peterburgyň hökümetiniň arasynda 2023-2027-nji ýyllarda söwda-ykdysady, ylmy-tehniki we medeni ugurlarda hyzmatdaşlyk etmek barada çäreleriň Meýilnamasyna “Ýol kartasyna” gol çekildi.
Gol çekmek dabarasyndan soňra myhmanlar Arkadag şäherine aýlanyp gördüler. Myhmanlar ekologiýa taýdan arassa elektrobusda Döwletmämmet Azady adyndaky Arkadag şäher döwlet kitaphanasyna bardylar. Bu ýerde olar Türkmenistanyň Halk Maslahatynyň Başlygy Gurbanguly Berdimuhamedowyň eserleri, Magtymgulynyň goşgular ýygyndysy, şeýle hem çagalar üçin niýetlenen bölüm bilen tanyşdylar. Hormatly myhmana “Arkadag şäheri—geljegiň şäheri” atly kitap sowgat berildi.
Akylly şähere gezelenjiň çäklerinde russiýaly wekiliýet Arkadag şäheriniň ýaşaýjysy, Kerwen Durdygulyýewiň öýlerine myhmançylyga bardylar.
Arkadag şäheriniň gözel künjekleri bilen tanyşlygyň barşynda, myhmanlar ýaşaýyş jaýynyň ýanyndaky 250 adama niýetlenen sadaka jaýy, awtoduralga, “Nesip” söwda merkezi bilen hem tanyşdylar.
Gezelenç Görogly adyndaky döwlet atçylyk sirkine baryp görmek bilen jemlendi.