Türkiýe Respublikasynyň paýtagty Ankara şäherinde Arkadag şäheriniň tanayşdyryş dabarasy hem-de Magtymguly Pyragynyň 300 ýyllygyna bagyşlanan halkara bäsleşigiň badalga berilmegine bagyşlanan çäre guraldy.
Türkmenistanyň Türkiýe Respublikasyndaky ilçihanasy hem-de Türki dünýäsiniň inžener we binagärler birleşiginiň goldaw bermegine Ankara şäherindäki Jemgyýetçilik bilimleri uniwersitetiniň binasynda Arkadag şäheriniň tanayşdyryş dabarasy hem-de Magtymguly Pyragynyň 300 ýyllygyna bagyşlanan halkara bäsleşigiň badalga berilmegine bagyşlanan çäre guraldy.
Dabaraly çärelere diplomatlar, Ankara şäheriniň Mamak etrabynyň häkimi Murat Köse. jemgyýetçilik-syýasy guramalaryň ýolbaşçylary, döredijilik we ylmy-intelligensiýasynyň wekilleri, Türkiýäniň öňdebaryjy ýokary okuw mekdepleriniň ýolbaşçylary we professor mugallymlary, şeýle hem köpçülikleýin habar beriş serişdeleriniň wekilleri gatnaşdy.
Arkadag şäheriniň tanyşdyrylyş dabarasynda täze şäheriň taslamasynyň ilkinji nobatda Türkmenistanyň durmuş-ykdysady ösüşine we ilatyň ýaşaýyş şertlerini gowulandyrmaga gönükdirilendigi nygtaldy.
Şeýle hem, çärä gatnaşanlar täze Arkadag şäheriniň taslamasynyň durmuşa geçirilmeginde ýatdan çykmajak täsir galdyrýan ajaýyp şäher döretmäge mümkinçilik berýän binagärlikdäki milli däp-dessurlary göz öňünde tutup, häzirki zaman öňdebaryjy tejribäniň ulanylandygyny bellediler.
Türki dünýäsiniň inžener we binagärler birleşiginiň baş sekretary Ilýas Demirji öz çykyşynda 2024-nji ýylda Türkmenistanda we ähli türki dünýäsinde beýik akyldar şahyr Magtymguly Pyragynyň 300 ýyllygynyň giňden bellenilip geçiljekdigini belläp geçdi.
Magtymguly Pyragynyň diňe bir gündogarda däl, eýsem tutuş dünýäde poeziýanyň ösüşine uly goşant goşandygyny bellän Ilýas Demirji Türki dünýäsiniň inžener we binagärler birleşiginiň geňeşiniň tarapyndan türki dilli döwletleriň ýaş alymlarynyň arasynda Magtymguly Pyragynyň döredijiligine bagyşlanan halkara bäsleşigini geçirmek hakynda çözgüt kabul edendigini uly buýsanç bilen belledi.
Bäsleşigiň emin agzalarynyň düzümi 2023-nji ýylyň 5-nji oktýabrynda yglan ediler we onuň netijeleri 2024-nji ýylyň maýynda jemlener.
Ilýas Demirji bu halkara bäsleşiginiň geçirilmeginiň Magtymguly Pyragynyň döredijiliginiň türki dünýäsiniň alymlarynyň arasynda has-da giňden ýaýbaňlandyrmaga hem-de halkara medeni gatnaşyklaryň ösdürilmegine mümkinçilik berjekdigini belledi.