Özbegistanyň paýtagty Daşkent şäherindäki «Özbegistan» halkara forumlar köşgünde «Merkezi Aziýa — bilimiň, ylmyň we innowasiýalaryň täze giňişligi» atly Merkezi Aziýanyň halkara bilim forumy öz işine başlady. Bu foruma Türkmenistanyň bilim ministri Jumamyrat Gurbangeldiyewiň ýolbaşçylygyndaky wekiliýet gatnaşdy.
Özbegistan Respublikasynyň bilim we ylym ministri Erkinjon Turdimowyň başlyklyk etmeginde guralan foruma Gyrgyz Respublikasynyň ylym, ýokary bilim we innowasiýalar ministri Gülzat Isamatowa, Täjigistan Respublikasynyň bilim we ylym ministri Rahim Hamro Saidzода, Gazagystan Respublikasynyň ylym we ýokary bilim ministriniň orunbasary Dinara Şeglowa, Türkiýäniň Ýokary bilim geňeşiniň (YÖK) başlygy Erol Özwar, Pakistanyň bilim we hünär taýýarlygy boýunça federal ministri Wajiha Kamar we köp sanly myhmanlar gatnaşdy.
Forumyň resmi açylyş dabarasyna Özbegistan Respublikasynyň Prezidentiniň Diwanynyň Kommunikasiýalar departamentiniň ýolbaşçysy — Prezidentiň metbugat sekretary Şerzod Asadow gatnaşyp, Özbegistan Respublikasynyň Prezidentiniň foruma gatnaşyjylara iberen gutlagyny okady.
Foruma Özbegistanyň, Gazagystanyň, Gyrgyzystanyň, Täjigistanyň we Türkmenistanyň bilim ministrleri, beýleki birnäçe döwletiň bilim edaralarynyň wekilleri, daşary ýurtlaryň öňdebaryjy ýokary okuw mekdepleriniň ýolbaşçylary, halkara guramalaryň wekilleri, şeýle hem ýerli we daşary ýurtly bilermenler gatnaşýarlar.
Foruma jemi 1500-den gowrak adamyň gatnaşmagy geçirilip, onuň çäklerinde bilim ulgamyny ösdürmegiň möhüm meseleleri, ýokary okuw mekdepleriniň arasyndaky hyzmatdaşlygyň geljegi, ylmy barlaglaryň netijeliligini ýokarlandyrmak, akademiki hereketliligi giňeltmek, bilelikdäki bilim maksatnamalaryny durmuşa geçirmek, ylmy-innowasion hyzmatdaşlygy ösdürmek we bilimiň hilini ýokarlandyrmak ýaly ugurlar ara alnyp maslahatlaşylýar.
Forumyň maksatnamasy resmi açylyş dabarasyny, umumy mejlisi, bilim ministrleriniň tegelek stol maslahatyny, üç sany ugurdaş mejlisi, şeýle hem «Study in Uzbekistan» («Özbegistanda bilim almak») atly bilim sergisini we ýokary okuw mekdepleriniň arasynda hyzmatdaşlyk meseleleri boýunça duşuşyklary öz içine alýar.
Forumyň netijeleri boýunça akademiki alyş-çalyşlary ösdürmäge, bilelikdäki bilim maksatnamalaryny we ylmy taslamalary durmuşa geçirmäge, şeýle hem ýokary okuw mekdepleriniň arasyndaky hyzmatdaşlygy pugtalandyrmaga gönükdirilen ylalaşyklaryň gazanylmagyna garaşylýar.