Türkmenistanda saparda bolýan German ykdysadyýetiniň Gündogar komitetiniň Baş sekretary Mihael Harms sebitde «akylly» şähergurluşy bilen tapawutlanýan Arkadag şäherine geldi.
Myhman Arkadag şäher häkimliginde şäheriň häkimi, şeýle-de Arkadag şäheriniň gurluşygy boýunça döwlet komitetiniň başlygy bilen duşuşdy. Onuň barşynda, hususan-da, «akylly» şäheriň eko we gurluş aýratynlyklary hakda durlup geçildi.
German ykdysadyýetiniň Gündogar komitetiniň Baş sekretary Mihael Harms hem hut şu nukdaýnazardan, özüni gyzyklandyrýan birnäçe sowallary berdi we olara doly kanagatlanarly jogaplary aldy. Köpetdagyň eteginde, jana ýakymly howa şertlerine eýe künjekde gurlan Arkadag şäherinde dowam edýän gurluşyklar bilen aýratyn gyzyklanan myhmana şäheriň ikinji tapgyrynda alnyp barylýan işler hakynda hem giňişleýin gürrüň berildi.
Bilşimiz ýaly, Arkadag şäheriniň ikinji tapgyrynyň gurluşygynda, esasan, önümçilik toplumlarynyň, senagat we önümçilik kärhanalarynyň, lukmançylyk maksatly binalaryň gurulmagy göz öňünde tutulýar. Germaniýaly myhmana hem hut şular hakynda gürrüň berlip, öňde goýulýan maksatlara laýyklykda, şäheriň ähli babatda dünýäniň ösen derejesine doly bap gelmegi ugrunda yhlasly tagalla edilýändigi aýdyldy.
Jenap Mihael Harms Arkadag şäherine gelmek bilen, örän ýakymly duýgulary başyndan geçirendigini belledi we «akylly» şäheriň geljeginiň uludygyny, onda ýerine ýetirilen we indiki edilmeli işleriň nazarynda hem görüp bolýandygyny nygtady.