Gazagystan Respublikasynyň Premýer-ministri Alihan Smailowyň baştutanlygynda Garaşsyz Döwletleriň Arkalaşygyna gatnaşyjy ýurtlaryň hökümet baştutanlarynyň nobatdaky mejlisi geçirildi. Onlaýn tertibinde geçirilen mejlise Türkmenistanyň Ministrler Kabinetiniň Başlygynyň orunbasary Muhammetguly Muhammedow gatnaşdy.
GDA-nyň çäklerinde dürli ugurlarda hyzmatdaşlygy ösdürmegiň giň toplumynyň ara alyp maslahatlaşylan duşuşygyna Azerbaýjan Respublikasynyň Premýer-ministri Ali Asadow, Ermenistan Respublikasynyň wise-premýeri Mger Grigorýan, Belarus Respublikasynyň Premýer-ministri Roman Golowçenko, Gyrgyz Respublikasynyň Ministrler Kabinetiniň Başlygy – Gyrgyz Respublikasynyň Prezidentiniň Administrasiýasynyň ýolbaşçysy Akylbek Žaparow, Russiýa Federasiýasynyň Hökümetiniň Başlygy Mihail Mişustin, Täjigistan Respublikasynyň Premýer-ministri Kohir Rasulzoda, Özbegistan Respublikasynyň Premýer-ministri Abdulla Aripow hem-de GDA-nyň Ýerine ýetiriji sekretary Sergeý Lebedew gatnaşdy.
Hökümet baştutanlary güdn tertibiniň ähli meselelerine seredip, 10 resminamany kabul etdi. Duşuşygyň barşynda GDA-nyň çäklerinde ykdysady hyzmatdaşlyk meseleleri ara alyp maslahatlaşyldy.
Şeýle hem GDA-nyň giňişliginde gurama gatnaşyjy döwletlerde 2030-njy ýyla çenli maglumat howpsuzlygyny üpjün etmegiň strategiýasyny durmuşa geçirmegiň ilkinji nobatdaky çäreleriniň meýilnamasyna seredildi.
Hökümet Baştutanlarynyň geňeşiniň agzalary biologik materiallary alyş-çalyş ylalaşygyna gol çekdiler. Umumy ylmy-tehnologik giňişligi döretmek baradaky ylalaşyga girizilen üýtgetmeler tassyklandy. Köp ýyl mundan ozal kabul edilen resminama ylym, tehnika, tehnologiýa we innowasiýa ösüşleri nazarda tutulyp, häzirki zaman şertlerinde kämilleşdirildi.
Mundan başga-da, hökümet baştutanlary üzümçiligi ösdürmek baradaky konsepsiýany tassykladylar. “GDA-nyň ýaşlar paýtagty” halkara taslamasy boýunça degişli çözgütler kabul edildi.
Geňeşiň mejlisinde birnäçe guramaçylyk meselelerine hem seredildi. GDA-nyň Döwletara statistika komitetiniň başlygy Konstantin Laýk tassyklandy.
GDA-nyň hökümet baştutanlarynyň indiki mejlisini noýabr aýynda Nur-Sultan şäherinde geçirmek babatda çözgüt kabul edildi.