UEFA-nyň Çempionlar ligasynyň finalynda duşuşjak toparlar belli boldy. Finalda Ispaniýanyň “Real Madrid” topary bilen Angliýanyň “Liwerpul” topary duşuşar.
Ispaniýanyň “Real Madrid” topary ilkinji duşuşygynda 4:3 hasabynda ýeňlen Angliýanyň “Mançester Siti” toparyny öz meýdançasynda 3:1 hasabynda utup, finala çykdy.
SALAHYŇ ARZUWY HASYL BOLDY
Angliýanyň “Liwerpul” toparynyň müsürli hüjümçisi Mohamed Salahyň arzuwy hasyl boldy. Ol finalda “Real Madrid” topary bilen duşuşmagy arzuw edipdi.
“REAL MADRID” ÖZ MEÝDANÇASYNDA JADYLAÝJY GÜÝJE EÝE
Ispaniýanyň “Real Madrid” topary gazanan 13 kubogy bilen Ýewropanyň futbol ýaryşlarynyň öňdebaryjy toparydyr. Öz meýdançasynda jadylaýjy güýje eýe bolan “Real Madrid” 73-nji minutda Angliýanyň “Mançester Siti” toparynyň futbolçysy Riýad Mareziň geçiren goly bilen 1:0 hasabynda yza galandygyna garamazdan, 90-njy minutda Rodrigo we 90+1-nji minutda ýene-de Rodrigonyň gollary bilen öňe saýlandy.
95-nji minutda bolsa Karim Benzemanyň 11 metrlik jerime urgusyndan geçiren goly bilen finala çykdy.
“REAL” BILEN “LIWERPUL” 3-NJI GEZEK FINALDA DUŞUŞAR
Şeýlelikde, Ispaniýanyň “Real Madrid” topary Angliýanyň “Liwerpul” topary bilen finalda duşuşar we final duşuşygy 28-nji maýda Pariž şäherinde oýnalar.
Bu iki topar 3-nji gezek finalda duşuşar. Olaryň arasyndaky ilkinji duşuşyk 1981-nji ýylda bolupdy we onda “Liwerpul” topary ýeňiş gazanypdy.
2018-nji ýyldaky duşuşykda bolsa, “Real Madrid” topary 3:1 hasabynda ýeňipdi. 2018-nji ýyldaky finalda Mohamed Salah oýnuň başlarynda şikes alyp çykypdy. Şonuň üçin Salah finalda ýene-de “Real Madrid” bilen duşuşmagyň arzuwyny etdi.