Ýewropanyň futbol boýunça ygtyýarly edarasy UEFA 2021-2022-nji ýylyň möwsüminden başlap, täze futbol ýaryşyna badalga berýär. Häzirki wagtda bu guramanyň gurnaýan birinji derejeli Çempionlar Ligasy hem-de ikinji derejeli UEFA Ýewropa Ligasy ýaryşlary futbol janköýerleriniň iň köp tomaşa edýän ýaryşlary bolup durýar.
Gurama täze möwsümden üçünji derejeli ýene-de bir ýaryşy gurnamagy göz öňünde tutýar. Ol hem UEFA-nyň Konferensiýa Ligasydyr. Onuň resmi tanyşdyrylyş dabarasy guraldy. Toparlar 57,5 santimetr beýikligindäki, agramy 11 kilogram bolan kubogy gazanmak ugrunda özara bäsleşerler.
Bu ýaryşy duşuşyklary hem UEFA Ýewropa Ligasy ýaly perşenbe günleri geçiriler.
Konferensiýa Ligasy UEFA-nyň düzümindäki ýurtlardan has köp toparyň guramanyň gurnaýan ýaryşlaryna gatnaşmagy üçin döredildi. Bu ýaryşyň ilkinji nobatda 2021-2024-nji ýyllarda dowam etdirilmegi meýilleşdirilýär.
Ýaryşa 32 topar gatnaşdyrylar. Ol her bir 4 topardan ybarat bolan 8 toparça bölüner. Toparlar toparçada 6 duşuşyk geçirer. Duşuşyklar perşenbe günleri bolar.
UEFA-nyň Konferensiýa Ligasynda toparçada öňdäki orunlary eýelän 8 topar soňky tapgyra çykar. Toparçada ikinji orny eýelän toparlar bolsa Ýewropa Ligasynda toparçada üçünji orny eýelän toparlar bilen özara duşuşyp, bir soňky tapgyra çykmak mümkinçiligine eýe bolar.
Soňra 1/16 tapgyryň duşuşyklary, çärýek final, ýarym final hem-de final duşuşyklary geçiriler. Netijede, çempion belli bolar.
UEFA Konferensiýa Ligasynyň ilkinji final duşuşygy Albaniýanyň Tiran şäherinde geçiriler. Tirandaky 21 müň 690 orunlyk “Arena Kombetare” stadionyndaky final duşuşygy 2022-nji ýylyň 25-nji maýynda bolar.