Ozal habar berşimiz ýaly, şu gün Eýran Yslam Respublikasynda prezident saýlawlarynyň 2-nji tapgyry geçirilýär. Onuň çäklerinde Türkmenistandaky Eýranyň raýatlary üçin iki şäherde – Aşgabatda we Maryda saýlaw uçastogy döredildi.
Eýran Yslam Respublikasynyň Aşgabatdaky ilçihanasynyň habar bermegine görä, Türkmenistanda ýaşaýan eýranlylar, Eýranyň Aşgabatdaky ilçihanasynda ýa – da Mary şäherindäki baş konsullygynda bu saýlawa gatnaşyp, öz seslerini bermek mümkinçiligine eýe boldular.
Lotfabad we Aşgabat terminallarynda eýranly sürüjileriň seslerini ýygnamak üçin hem mobil gutusy hereket etdi.
Eýran Yslam Respublikasynyň Prezident saýlawlarynyň 1-nji tapgyry geçen hepde geçdi we dalaşgärler Masud Pezeşkian we Said Jalili saýlawyň ikinji tapgyryna geçdiler.
Bu ýerde “Ata Watan Media” toparynyň sowallaryna jogap beren Eýran Yslam Respublikasynyň Türkmenistandaky Adatdan daşary we Doly ygtyýarly ilçisi Ali Mojtaba Ruzbehani saýlawlardan soňra Türkmenistan bilen Eýranyň arasyndaky gatnaşyklaryň merhum Prezident Seýed Ebrahim Raisiniň ýolundan dowam etjekdigine ynam bildirdi.
Eýranyň ilçisi Eýran Yslam Respublikasynyň täze ýolbaşçysynyň döwründe-de türkmen-eýran gatnaşyklarynyň ähli ugurlarda has-da pugtalanjakdygyny belledi.