Birleşen Milletler Guramasynyň Ösüş Maksatnamasy (BMGÖM) bilen Türkmenistanyň Bilim ministrliginiň arasynda ýurdumyzyň bilim ulgamyny güýçlendirmek we durnukly ösüş tejribesini ösdürmek üçin hyzmatdaşlygy giňeltmek babatda özara düşünişmek hakyndaky ähtnama gol çekdiler. Bu barada BMGÖM-iň resmi saýtynda habar berilýär.
Özara düşünişmek hakyndaky ähtnama BMGÖM bilen Türkmenistanyň Bilim ministrliginiň arasynda ýurduň ilatyna jemgyýetçilik bilim hyzmatlaryny bermek ulgamynyň netijeliligini ýokarlandyrmak maksady bilen hyzmatdaşlyga esas döredýär. Ylalaşyk, Türkmenistanda bilim maksatnamalaryny gowulandyrmak, adam hukuklary we gender deňligi ýörelgelerini birleşdirmek, howanyň üýtgemegi başlangyçlaryny goldamak we Türkmenistandaky bilim edaralary arkaly sagdyn durmuş ýörelgesini ösdürmek meselesinde umumy tagallalary görkezýär.
Bu ähtnamanyň esasy ugry, sanly tehnologiýalary we innowasion çözgütleri Türkmenistanyň bilim ulgamyna ornaşdyrmakdan ybaratdyr. Öňdebaryjy tehnologiýany ulanyp, ilatyň zerurlyklaryny has gowy kanagatlandyryp biljek has täsirli we öz içine alyjy bilim ulgamyny döretmegi maksat edinýär.
BMGÖM-niň Türkmenistandaky hemişelik wekili hanym Narine Sahakýan: “Bu özara düşünişmek hakyndaky ähtnama Türkmenistanda sanly bilimi we durnukly ösüşi gowulandyrmak üçin möhüm ädimdir” -diýip belledi. “Innowasiýa we tehnologiýany ulanyp, hemmelere peýdaly we täsirli bilim ulgamyny döretmäge çalyşýarys.” diýip, belläp geçdi.