Azerbaýjanyň paýtagty Baku şäherinde Goşulyşmazlyk hereketine agza döwletleriň gatnaşmagynda ilkinji gezek “Zenanlaryň hukuklaryny ösdürmek we ygtyýarlyklaryny ýokarlandyrmak” atly halkara maslahat geçirilýär. Oňa Türkmenistanyň wekiliýeti hem gatnaşýar.
Halkara maslahatda çykyş eden Türkmenistanyň Zenanlar birleşiginiň Merkezi geňeşiniň başlygy Akjemal Durdyýewa Baku şäherinde geçirilýän bu maslahatyň tutuş dünýäde gender deňligini üpjün etmek üçin ugurlary gözläp tapmaga mümkinçilik berjekdigini belledi.
Azerbaýjanyň metbugatynyň habaryna görä, türkmen tarapy öz çykyşynda Türkmenistanyň Zenanlar birleşiginiň esasy strategiýasynyň gender deňligi syýasatyny durmuşa geçirmegi üpjün etmekden ybaratdygyny belledi.
Türkmen wekiliýeti agzasy zenanlaryň hukuklarynyň goralmagy bilen ýurtlaryň durmuş-ykdysady ösüşde görnetin üstünlikler gazanjakdygyny belledi.
Bu maslahat Goşulyşmazlyk hereketine başlyklyk edýän Azerbaýjan tarapyndan Uganda we Özbegistanyň ýakyndan ýardam bermeginde geçirildi.
Maslahata 60 töweregi döwletlden wekiliýet gatnaşýar, olaryň hatarynda gurama agza döwletler bilen bir hatarda synçy döwletler, halkara guramalar, şeýle hem hormatly myhman hökmünde çagyrylan ýokary derejeli myhmanlar bar.