Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Şanhaý Hyzmatdaşlyk Guramasynyň (ŞHG) Sammitiniň çäklerinde geçirilen wekiliýet baştutanlarynyň «ŞHG+» görnüşindäki duşuşygyndaky çykyşynda Türkmenistan-Owganystan-Pakistan-Hindistan gaz geçirijisi gurluşygyna gatnaşmak mümkinçiligine garamaga çagyrdy. Bu barada “Kaninform” habarlar gullugy habar berdi.
Türkmenistan halkynyň Milli Lideri Owganystanyň üstünden geçýän gaz geçirijisiniň gurluşygynyň bu ýurduň ykdysady we durmuş taýdan gaýtadan dikelmegine goşant goşjakdygyny belledi.
Türkmenistanyň Halk Maslahatynyň Başlygy ŞHG-niň gyzyklaýan döwletlerine Owganystanyň üstünden geçýän energetika we aragatnaşyk taslamalaryna gatnaşmagyň parametrlerine garamagy teklip etdi.
Gürrüň Türkmenistan-Owganystan-Pakistan-Hindistan gaz geçiriji we Türkmenistan-Owganystan-Pakistan elektrik we optiki-süýümli aragatnaşyk geçirijisi barada barýar.
Bu Owganystanyň sebit we kontinental proseslere çalt we täsirli birleşmegini üpjün eder, şeýle hem ýurduň ykdysady we sosial taýdan dikeldilmegine, şeýlelik bilen Owganystandaky syýasy ýagdaýyň durnuklaşmagyna goşant goşar, diýip türkmen halkynyň Milli Lideri belledi.
Şeýle hem Halk Maslahatynyň Başlygy öz çykyşynda Türkmenistanyň ŞHG bilen hyzmatdaşlygyň beýleki möhüm ugurlarynyň hatarynda söwdany, senagat kooperasiýasyny, oba hojalyk ulgamyny, «ýaşyl» gün tertibini, maglumat tehnologiýalary ulgamyndaky hyzmatdaşlygy hasaplaýandygyny aýtdy.
Şeýle-de kiçi we orta telekeçiligi çekmek bilen serhetýaka we sebit işewürlik hyzmatdaşlygynyň nusgalarynyň geljegi uly hasaplanylýandygyny hem-de ynsanperwer ylym-bilim ulgamlarynda gatnaşyklary giňeltmäge we işjeňleşdirmäge çalyşýandygymyzy beýan edildi.