Käte sowadyjyda ýakymsyz ys peýda bolýar. Şeýle ýagdaýda sowadyjynyň içini boşadyp, ony arassalamaly. Ýakymsyz ys şonda-da aýrylmasa ýa-da ol ýene-de peýda bolar öýtseňiz, ysy aýyrmak üçin şu aşakdakylardan peýdalanyp bilersiňiz:
— arassalanan düýp soganyň ýarysy;
— tüwi däneleri;
— biraz suw garylan nahar sodasy;
— böleklenip, gaplara salnan limon;
— her ýerde bir bölegi goýlan gara çörek;
— apelsiniň gabygy (terligine);
— limon şiresine batyrylan mata bölegi;
— agzy açyk banka salnan täze üwelen kofe.
Sowadyjydaky ýakymsyz ysy diňe onuň içindäki iýmit däl-de, eýsem, ondaky suw akýan ýollaryň hapalanmagy hem döredip biler. Sowadyjydaky önümlere ýakymsyz ys çykmaz ýaly, käbir önümleri aýry-aýry tekjelerde, biri-birinden daşrak goýmaly. Şeýle hem täze önümleri sowadyjyda ýerleşdireniňizde, öňküleri öňe, elýeter ýere süýşüriň. Şeýle edilende, olar zaýalanyp galmaz. Haýsy önümleri biri-birine golaý saklamaly däl?
— peýnir, ir-iýmişler, bakja önümleri;
— kakadylan önümler, peýnirler;
— büzmeçler, ir-iýmişler, bakja önümler;
— ýeralma, käşir, kelem, ir-iýmişler;
— sitruslar, bananlar.
Sagdyn iýmitlenmek üçin dükanlardan we bazarlardan satyn alýan önümleriňiziň saklanyş möhletine üns beriň, sowadyjyda goýlandan soň hem hemişe gözegçilik edip duruň. Bu makala «Türkmenistan» gazetiniň sahypasynda çap edildi.