Özbegistanyň Prezidenti Şawkat Mirziýoýew Türkiýe Respublikasynda resmi saparda boldy. Ol Türkiýäniň Prezidenti Rejep Taýyp Ärdogan bilen duşuşdy we özbek-türk ýokary derejedäki strategik hyzmatdaşlyk geňeşiniň üçünji mejlisine gatnaşdy.
Bu geňeş iki ýurduň arasyndaky hyzmatdaşlyk taryhynda möhüm tapgyra öwrüldi. Şu gezekki saparyň çäklerinde iki ýurduň arasynda 10 milliard dollara barabar maýa goýum taslamalary boýunça ylalaşyklar gazanyldy.
Soňky ýyllarda iki ýurduň arasyndaky söwda dolanyşygy 1,5 esse, döredilen bilelikdäki kärhanalaryň sany 2 esse, Türkiýäniň özbek ykdysadyýetine maýasy 2,5 esse artdy. Iki ýurduň arasyndaky iri şäherleriň arasynda her hepde 90 uçar gatnawlary ýerine ýetirilýär. Türkiýeden Özbegistana barýan syýahatçylaryň sany 3 esse artdy.
Gysga döwürde iki ýurduň arasyndaky haryt dolanyşygyny 5 milliard dollara ýetirmek öňde goýlan wezipeleriň hatarynda görkezildi.
Özbegistanda «Cengiz Holding», «Aksa Energy», «Çalık Holding», «Akay Inşaat», «Anadolu Group», «Özgüven», «Eczacıbaşı Holding» ýaly iri türk kompaniýalary işläp, olaryň gatnaşmagynda 100-den gowrak taslama durmuşa geçirilýär.
Stambul şäherinde Özbegistanyň söwda wekilhanasynyň açylmagy babatda ylalaşyk gazanyldy.