Türkmenistan Owganystan bilen söwda dolanyşygynyň möçberini 1 milliard dollara ýetirmegi meýilleşdirýär. Bu barada Owganystanyň Daşary işler ministrligi Türkmenistanyň daşary işler ministrine salgylanyp habar berýär.
Mälim bolşy ýaly, golaýda 16-17-nji dekabrda Türkmenistanyň daşary işler ministriniň ýolbaşçylygyndaky Türkmenistanyň wekiliýeti Owganystanyň Hyrat welaýatyna iş saparyny amala aşyrdy.
Şonda geçirilen gepleşiklerde iki ýurduň arasyndaky söwda gatnaşyklaryny ösdürmek üçin toplumlaýyn ýol kartasynyň işlenip düzülmeginiň möhümdigine üns çekildi.
Şeýle hem Aşgabatda owgan harytlarynyň sergisini geçirmäge taýýarlyk görülýändigi hem bellenilip geçildi.
Energetika ulgamyndaky hyzmatdaşlyk barada durlup geçilip, onda Türkmenistan-Owganystan-Pakistan-Hindistan gaz geçirijisiniň Owganystandaky gurluşygyna ýakyn wagtda girişmegiň meýilleşdirilýändigi bellenildi.
Owganystanyň daşary işler ministri Amir Han Mottaki TOPH gaz geçiriji taslamasyny durmuşa geçirmek üçin mümkinçilik dörändigini belläp, bu taslamany durmuşa geçirmek üçin degişli işleriň geçirilendigini belledi.
Owgan ministri ulag ulgamyndaky hyzmatdaşlyk barada durup geçip, ikitaraplaýyn söwda we üstaşyr gatnawlaryň ösýändigini aýdyp, ikitaraplaýyn hyzmatdaşlygy dürli ugurlarda ösdürmek üçin geňeşmeleri dowam etdirmegiň möhümdigini belledi.