Umuman, awgust aýy futbol dünýäsinde Lionel Messiniň aýy boldy. Onuň 13 ýaşyndan bäri, çykyş edip gelýän Ispaniýanyň “Barselona” toparyndan gitmegi dünýä metbugatynda, hususan-da sport neşirlerinde köp ýazylan habar boldy.
Messi bilen köp sanly toparlar gyzyklanma bildirdi. Ýöne ol Fransiýanyň “PSŽ” toparyny saýlap aldy. Şeýlelikde, 6 gezek “Ballon d’Or” baýragynyň eýesi Messi fransuz topary bilen 2+1 ýyl möhlet bilen şertnama baglaşdy.
Messi bu topara erkin agent hökmünde geçdi. Onuň “Barselona” topary bilen şertnamasy 30-njy iýunda tamamlanypdy. Habar berlişine görä, Messi bu toparynda her möwsüm üçin 35 million ýewro gazanar.
“PSŽ” TOPARY IŇ GÜÝÇLI FUTBOLÇYLARY HATARYNA GOŞDY
Şu möwsümde iň köp hem-de iň güýçli futbolçylary öz hataryna goşan ýeke-täk topar “PSŽ” diýsek hem ýalňyşmarys. Katarly işewür Nasser Al-Khelaifiniň ýolbaşçylygyndaky bu topar täze möwsümiň öňüsyrasynda düzümine Lionel Messi bilen bir hatarda ispan goragçy Serhio Ramosy, Italiýanyň milli ýygyndysynyň derwezebany hem-de Ýewropa çempionatynyň iň gowy futbolçysy saýlanan Janluiji Donnarummany, ýarymgoragçy Jorjinio Weýnaldumy, şeýle hem goragçy Aşraf Hakimini satyn aldy.
MESSI: TÄZE FUTBOL KARÝERAMA BAŞLAÝARYN
Fransiýanyň “PSŽ” toparynyň resmi internet saýtyndaky habara görä, Messi täze futbol durmuşa barada gysgaça beýanat berdi. Leo Messi: “Pari-Sen-Žermen” toparynda karýeramyň täze bölümini başlamaga begenýärin. Topar meniň futbol isleglerime laýyk gelýär. Topara we onuň janköýerlerine täze bir aýratynlyk bilen kömek bermegi isleýärin. “Park-de Prens” stadionyna çykmagy sabyrsyzlyk bilen garaşýaryn” diýip belledi.