21-nji ýanwarda Marynyň «Merw» futbol topary «Awaza» milli syýahatçylyk zolagyndaky ilkinji okuw-türgenleşik ýygnanyşygy geçirmek üçin awtobusly iş saparyna ugrady. Bu barada “jankoyer.com.tm” internet neşiri habar berýär.
Ýaş tälimçi Jemşit Orazmuhammedowyň şägirtleri 22-nji ýanwardan başlap deňiz ýakasyndaky syýahatçylyk merkezinde bir hepdäniň dowamynda türgenleşerler. Klubyň metbugat gullugynyň habar berşi ýaly, Awazadaky türgenleşikler 28-nji ýanwara çenli dowam eder.
Ozal hem habar berşimiz ýaly, täze möwsümiň türgenleşiklerine ýanwar aýynyň ilkinji günlerinden girişen «Merw» düzümini ýaş we tejribeli futbolçylaryň birnäçesi bilen güýçlendirdi. Toparyň ozalky derwezeçisi Merdan Saparow bolsa Jemşit Orazmuhammedowyň tälimçiler ştabyna goşuldy. Geçen ýyl Ýokary ligada sekizinji orny eýelän «Merw» täze möwsümde üstünlikli çykyş edip, ýene-de AFK-nyň ýaryşlaryna gatnaşmak mümkinçiligini dikeltmek isleýär.