Angliýanyň “Çelsi” toparynyň baş tälimçisi Frenk Lempard wezipesinden boşadyldy. Bu barada toparyň resmi internet sahypasynda bellenilip geçilýär.
Bu toparyň düzüminde oýnap, ençeme kuboklary gazanan 42 ýaşly Frenk Lempard 2019-njy ýylyň tomsunda bu toparyň baş tälimçiligine bellenipdi.
– Bu gaty kyn karar boldy. Toparyň baş tälimçisi hökmünde gazanan üstünlikleri üçin Frenke minnetdarlyk bildirýäris. Şeýle-de bolsa, soňky gazanylýan netijeler we oýun toparyň garaşýan netijelerine laýyk gelmeýär. Ýöne bu ugurda karar kabul etmek kyn düşdi. Toparyň täze netijeleri gazanmagy zerur – diýip, toparyň bu baradaky beýanatynda bellenilip geçilýär.
Toparyň beýanatynda täze tälimçiniň kim boljakdygy barada hiç zat bellenilip geçilmedi. Ýöne metbugatdaky habarlara görä, Tomas Tuheliň täze tälimçi bolmagyna garaşylýar.
Angliýanyň milli çempionatynda “Çelsi” topary 29 utuk toplap, 9-njy orunda barýar. Çempionlar ligasynda “Çelsi” topary toparçadan birinji bolup çykyp, 1/8 finalda Ispaniýanyň “Atletiko” topary bilen duşuşar.
Lempard 2019-njy ýylyň tomsunda bu topara gelipdi. 2019/20-nji möwsümde “Çelsi” çempionatda 4-nji bolupdy.
Şu möwsümiň başynda Kawi Hawertsi 80 million ýewro, Timo Werneri 50 million ýewro, Ben Çilwelli 50,2 million ýewro, Hakim Ziýeçi 40 million ýewro hem-de Eduard Mendini 24 million ýewro satyn alyp, futbolçy satyn almaga köp maliýe serişdelerini gönükdiren “Çelsi” topary garaşylan netijäni görkezip bilmedi.
Gündelik durmuşa degişli habarlary biz Durmuş sahypamyza ýerleşdirýäris.
