Geçen ýyl Türkmenistanyň hemişelik Bitaraplygynyň 30 ýyllygy mynasybetli çapdan çykan “Makul Sözlük” sözlügi dünýäniň iň abraýly ýokary okuw mekdepleriniň biri bolan Garward uniwersitetiniň kitaphanasynyň resmi katalogyna girizildi.
Garward kitaphanasy dünýäniň iň uly we iň baý akademik kitaphana ulgamlarynyň biri hökmünde tanalýar. Bu kitaphana ulgamynda takmynan 20 milliondan gowrak kitap, ýüz müňlerçe ylmy žurnal, millionlarça golýazma hem-de dünýä derejesinde seýrek duş gelýän dürli arhiw materiallary saklanýar. Şeýle-de, Garward kitaphanasynda 400 milliondan gowrak sahypa sanly görnüşe geçirilip, alymlara we gözlegçilere elektron görnüşde elýeterli edilendir.
Garward kitaphanasy 70-den gowrak aýratyn kitaphanadan ybarat bolup, olaryň hatarynda dünýäde giňden tanalýan Widener kıtaphanasy, Houghton itaphanasy hem-de Garward Hukuk mekdebi kitaphanasy ýaly öňdebaryjy ylmy merkezler bar. Kitaphana Amerikanyň Birleşen Ştatlarynyň Massaçusets ştatynyň Kembridž şäherinde ýerleşýär.
Resmi katalog maglumatlary (HOLLIS)
Garward uniwersitetiniň HOLLIS atly resmi katalog ulgamynda ýerleşdirilen maglumatlara görä, “Makul English–Turkmen Dictionary = Iňlisçe–Türkmençe sözlük” Widener kitaphanasynyň ýygyndysyna girizildi. Kitap Orta Gündogar we Merkezi Aziýa bölümi boýunça klassifikasiýa edilip, Widener kitaphanasynyň (Mid East) bölüminde saklanýar.
Katalog maglumatlarynda aşakdakylar görkezilýär:
Awtor / düzüji: Dr. Dovran Orazgylyjov (Editor in Chief)
Neşir edilen ýeri: Amerikanyň Birleşen Ştatlary
Neşir edilen ýyly: 2025
Göwrümi: 453 sahypa
Dilleri: Iňlisçe we türkmençe
Tema: English language – Dictionaries – Turkmen
Sözlük barada
Mälim bolşy ýaly, geçen ýyl neşir edilen “Makul English–Turkmen Dictionary: General, Law, Business, Medicine, AI, Sports” atly sözlükde 16 500-den gowrak iňlisçe söz türkmen diline terjime edilýär. Sözlük hukuk, ykdysadyýet, lukmançylyk, işewürlik, sport hem-de emeli intellekt (AI) ýaly birnäçe ýörite ugurlary öz içine alýar.
Redaksiýa topary we dizaýn
Sözlügiň taýýarlanmagyna birnäçe alymlar we hünärmenler gatnaşdy. Redaksiýa toparynyň düzümine aşakdakylar girýär:
Amangeldi Baýgeldiýew — Filosofiýa ylymlarynyň kandidaty
Azat Nazarow — Dilçi
Şamil Roznazarow — “Makul Hyzmat” Terjime merkeziniň direktory
Dowran Orazgylyjov — Hukuk ylymlarynyň doktory, awtor we baş redaktor
Kitabyň kompýuter dizaýny ýaş hünärmen Ysmaýyl Orazgylyjov tarapyndan ýerine ýetirildi. Neşir işi “Makul Hyzmat” Terjime merkezi tarapyndan goldanyldy.
Halkara ykrar edilmegi
Sözlügiň giriş sözi halkara derejede tanalýan alymlar we resmi şahslar tarapyndan berlen pikirler bilen baýlaşdyryldy.
S. Frederick Starr (ABŞ-nyň Daşary syýasat geňeşinde Ýewraziýa boýunça barlagçy, Johns Hopkins uniwersitetiniň professory) bu sözlügiň “türkmen diliniň halkara derejede öz mynasyp ornuny eýelemegi üçin şert döredýändigini” belläp, ony “dilleriň arasynda möhüm köpri” hökmünde häsiýetlendirdi.
Eric Stewart (ABŞ–Türkmenistan Işewürlik geňeşiniň ýerine ýetiriji direktory) bolsa şeýle diýdi:
“Açyk aragatnaşyk söwda we maýa goýumlaryň binýadydyr. Bu kitap ýurtlarymyzyň arasynda uzak möhletleýin hyzmatdaşlygyň giňelmegine goşant goşar.”
“Amazon” arkaly elýeterli
“Makul Sözlügi” häzirki wagtda dünýäniň iň iri onlaýn kitap platformasy bolan “Amazon” arkaly hem satyn almak üçin elýeterlidir:
👉 https://www.amazon.com/dp/B0FQ1D2KRN
Ähmiýeti
“Makul Sözlügiň” Garward ýaly abraýly akademik kitaphananyň resmi katalogyna girizilmegi, türkmen diliniň halkara ylmy jemgyýetçiligindäki ornunyň pugtalanmagyna hem-de ony ylmy we akademik çeşme hökmünde tanatmaga uly goşant goşýar.
Şeýle hem bellemeli zat, Dr. Dowran Orazgylyjowyň türk we türkmen hukuk ulgamlarynda Önümleri Paýlaşmak Şertnamalary (Production Sharing Agreements) boýunça taýýarlan doktorlyk dissertasiýasy hem Garward uniwersitetiniň kitaphana katalogyna girizilendir.