Ozalky “UFC” çempiony Habib Nurmagomedow çalt iýmit restoranlarynyň zynjyryny döretmegi meýilleşdirýär. Ol 2023-nji ýylyň ahyryna çenli dünýäniň 5 döwletinde 150 iýmit nokadyny açmagy göz öňünde tutýar.
Bu barada Habib özüniň “Instagram” jemgyýetçilik torunda mälim etdi. Habib Russiýanyň çalt depginlerde ösýän fastfud, ýagny çalt taýýarlanýan iýmit bazarynda öz ornuny almagy maksat edinýär.
Onuň ilkinji jemgyýetçilik iýmit merkezi Moskwa şäherindäki “Moskwa-siti” işewürlik merkezinde işläp başlady. Maý aýynyň ahyryna çenli rus paýtagtynda ýene-de 14 nokat açmagy meýilleşdirýär.
“M-eat by Khabib” ady bilen restoranlaryň sanynyň artmagyna garaşylýar. Şeýle hem bu iýmit merkezleriniň Gazagystan, Özbegistan, Gyrgyzystan, Türkiýe we Birleşen Arap Emirliklerinde açmak göz öňünde tutulýar.
Nurmagomedow sekiz aýdan gowrak wagt bäri çalt nahar restoranlarynyň zynjyryny döretmegiň üstünde işledi. Onuň aýtmagyna görä, restoran ugrunda köp sanly işewürden teklip alandygyna garamazdan, jemgyýetçilik iýmit ulgamynda öz markasyny gurmagy ýüregine düwüpdir.