Şu gün paýtagtymyz Aşgabatda öz işine başlan «Türkmenistanyň nebiti we gazy-2024» atly halkara maslahatynyň plenar mejlisinde çykyş eden “Türkmengaz” döwlet konserniniň başlygy Maksat Babaýew “Galkynyş” gaz känini özleşdirmegiň nobatdaky we mundan soňky tapgyrlary barada durup geçdi.
Dünýäniň iň iri gaz ýataklarynyň biri bolan “Galkynyş” gaz käniniň gory 27,4 trillion kubmetre barabardygy bellenilýär.
Tapgyrlaýyn özleşdirilýän bu gaz käniniň nobatdaky tapgyrlary üçin halkara maýadarlar bilen gepleşikler işjeň alnyp barylýar. Gaz känini özleşdirmegiň 2-nji we 3-nji tapgyrlary boýunça 2025-nji ýylyň birinji çärýegine çenli oňyn netijelere garaşýarys, diýip Maksat Babaýew belledi.
“Galkynyş” gaz känini özleşdirmegiň birinji tapgyrynda “Petrofac”, “CNPC” we “Hyundai Engineering” kompaniýalary tarapyndan harytlyk tebigy gaz önümçilik desgalary guruldy.
“Türkmengaz” döwlet konserniniň başlygy Maksat Babaýew halkara nebitgaz forumynyň çäklerinde Bütindünýä bankynyň Türkmenistandaky we Gazagystandaky hemişelik wekili Andreý Mihneýew bilen duşuşdy.