Halkara Futbol Federasiýasy (FIFA) Braziliýanyň milli ýygyndysynyň düzümi bilen Urugwaýyň ýygyndysy bilen geçirilen duşuşykda şikes alyp, möwsümi tamamlan Neýmar üçin öwez tölegini tölär.
Häzirki wagtda Saud Arabystanynyň “Al-Hilal” toparynyň düzüminde çykyş edýän Neýmar uzak wagtlap ýaşyl meýdança dolanyp bilmeýär. Onuň duşuşykda alan şikesi zerarly operasiýa ediler.
Neýmar öňümizdäki döwürde saud toparyna kömek edip bilmeýär. Şonuň üçin FIFA guramasy Saud Arabystanynyň “Al-Hilal” toparyna Neýmar üçin öwez tölegini tölemek babatda çözgüt kabul etdi.
FIFA saud toparyna Neýmar üçin 7,5 million ýewro tölär. Bu guramanyň topara töläp biljek iň ýokary öwez töleginiň mukdayr bolup durýar.
Umuman, FIFA halkara duşuşykda şikes alyp, çykyş edýän toparynyň düzümine 28 günden köp möhletde goşulyp bilmeýän futbolçylar üçin belli bir möçberde öwez tölegi töleýär.
Tomus paslynda Fransiýanyň “PSŽ” toparyndan Saud Arabystanynyň “Al-Hilal” toparyna geçip, transfer möwsüminde uly seslenme döreden Neýmar bu toparynda 5 duşuşykda oýnap, bary-ýogy 1 gol geçirdi.
31 ýaşyndaky Neýmar 2011-nji ýyldan bäri Braziliýanyň milli ýygyndysynyň düzüminde çykyş edip gelýär. Ol 132duşuşykda oýnap, 83 gol geçirdi.