Eýranyň nebit ministri Jawad Owji Tähranda “SOCAR” kompaniýasynyň ýolbaşçysy Röwnag Abdullaýewiň ýolbaşçylygyndaky Azerbaýjan Respublikasynyň wekiliýeti bilen duşuşyk geçirdi. Bu barada Eýranyň “Shana” habarlar gullugy habar berýär.
Duşuşygyň barşynda taraplar ikitaraplaýyn gatnaşyklaryň we Tähran-Bakuwyň nebitgaz pudagyndaky hyzmatdaşlygynyň ösdürilmegine degişli meseleleri ara alyp maslahatlaşdylar.
Ikitaraplaýyn söwda gatnaşyklaryna ünsi çekip, taraplar tebigy gaz hyzmatdaşlygyny ösdürmek, Eýran, Azerbaýjan Respublikasy we Türkmenistan arasynda üçtaraplaýyn tebigy gaz alyş-çalşygy şertnamasyny durmuşa geçirmek we şertnamanyň durmuşa geçiriliş tapgyrlaryny taýýarlamak meselesini ara alyp maslahatlaşdy.
Energetika gatnaşyklaryny ösdürmek we Hazar deňzi sebitinde hyzmatdaşlygy pugtalandyrmak Azerbaýjan wekiliýetiniň Eýrana amala aşyran saparynyň gepleşikleriniň esasy mowzugyna öwrüldi.
Mälim bolşy ýaly, Aşgabatda geçirilen Ykdysady Hyzmatdaşlyk Guramasynyň 15-nji sammitiniň çäklerinde Eýran, Azerbaýjan Respublikasy we Türkmenistan arasynda üçtaraplaýyn tebigy gaz alyş-çalşygy ylalaşygy gazanyldy. Bu babatda Eýranyň hem-de Azerbaýjanyň arasynda degişli şertnama gol çekildi.
Şol ylalaşyk esasynda Türkmenistanyň tebigy gazyny “swap” görnüşinde Azerbaýjana ibermek göz öňünde tutulýar.