Russiýanyň “Zenit” topary bilen has uly şöhrat gazanan Russiýanyň güýçli hüjümçilerinden Artýom Dzýuba özüne täze topar tapdy. “Zenit” toparyndan soňra Türkiýede hem birnäçe wagtlygyna futbol oýnan Dzýuba “Lokomotiw” toparyna geçýär.
Rus metbugatynda berilýän habara görä, Artýom Dzýuba we Igor Smolnikow mundan beýläk “Lokomotiw” toparynda oýnar. Moskwanyň topary bu futbolçylar bilen möwsümiň ahyryna çenli şertnama baglaşmagy meýilleşdirýär.
Dzýuba lukmançylyk barlagyndan geçip, derrew şertnama baglaşar. Smolnikow bolsa, toparyň indiki türgenleşik döwründe onuň hataryna goşular.
Möwsümiň galan böleginde futbolçylaryň aýlyk haky 2,5 million rubl bolar.
Iki futbolçy hem häzirki wagtda erkin futbolçy hökmünde çykyş edýär. Dzýuba “Adana Demirspor” toparyny bilen şertnamasyny ýatyryp, erkin futbolçy bolupdy. Smolnikow bolsa “Torpedo” topary bilen şertnamasyny ýatyrypdy.