Angliýanyň “Premýer Liga” milli çempionatynyň çempiony bolmak ugrundaky ýaryş gyzgalaňly ýagdaýda dowam edýär. Çempionlyk üçin “Liwerpul” bilen “Mançester Siti” toparlary bäsleşýär.
Sişenbe güni “Liwerpul” topary “Aston Willa” toparyny 2:1 hasabynda utup, “Mançester Siti” topary bilen utuk sanyny deňlän hem bolsa, çarşenbe güni “Mançester Siti” topary “Wulwerhempton” toparyny 5:1 hasabynda ýeňip, ýene-de 3 utuk öňe saýlandy.
“Mançester Siti” topary bilen “Wulwerhempton” toparynyň arasyndaky duşuşygyň ykbalyny Kewin De Bruýne kesgitledi. Ol duşuşygyň 25-nji minutda 3 gol geçirdi. Duşuşygyň ikinji ýarymynda hem ýene-de bir gol geçiren Bruýne karýerasyndaky ilkinji “pokerini” gazandy. Ýagny ol bir duşuşykda ilkinji gezek 4 gol geçirmegi başardy.
– Bir duşuşykda 4 gol geçirmek örän möhümdir. Galyberse-de, gollaryň sany 5 bolup bilerdi – diýip, Bruýne habar berdi.
Şeýlelikde, çempionatyň tamamlanmagyna 2 hepde galanda “Mançester Siti” toparynyň 89, “Liwerpul” toparynyň bolsa 86 utugy bar.