Halkara sport işleri merkezi (CIES) futbolçylaryň häzirki bahalarynyň sanawyny täzeledi. Sanawyň iň ýokarky basgançagyna 166 million ýewrolyk baha bilen «Real Madridiň» braziliýaly ýyldyzy Winsius Junior ýerleşdi.
Madrid şäheriniň kluby bilen La Liga we UEFA-nyň Çempionlar ligasyna üstünlikli başlan ýyldyz eýýämden Ýewropanyň ýaş ýyldyzlaryndan öňe saýlanyp, ep-esli ara açmagy başardy.
Şeýlelikde, 21 ýaşly futbolçy «Borussiýa Dortmundyň» hüjümçisi Erling Holandy we «Mançester Sitiniň» ýyldyzy Fil Fodeni yzda galdyrdy.
Has takygy, sanawa görä, Fil Fodeniň häzirki transfer bahasy 152 million, Holandyňky bolsa 142 million ýewrodyr. Bu iki futbolçy sanawda degişlilikde ikinji we üçünji orunlary paýlaşýarlar.
Sanawda başga kimler bar?
CIES tarapyndan taýýarlanan sanawda «Mançester Ýunaýtediň» wekili Meýson Grinwud, «Lewerkuzenden» Florian Writz, «Borussiýa Dortmunddan» Jude Billingem dagylar hem bar.
Kerwenbaşy şu möwsümde nähili çykyş edýär?
La Ligada şu möwsümde 20 duşuşyga gatnaşan Winsius Junior bu duşuşyklarda 10 gezek tapawutlanyp, 5 goluň ýardam pasyny berdi. UEFA-nyň Çempionlar ligasynda bolsa bolsa alty duşuşyga gatnaşyp, şolarda 2 gezek tapawutlandy, 5 goluň ýardam pasyny berdi, şeýlelikde, «Real Madridiň» 7 goluna goşant goşdy.
«Real Madrid» bilen 143 duşuşyga çykan Winsius şolarda jemi 26 pökgi geçirip, 32 gezek ýardam pasyny berdi.
Winsius Madrid şäheriniň klubyna gelmänkä, Braziliýanyň «Flamengo» toparynda çykyş edýärdi. Ol ozalky toparynda 49 duşuşykda 10 gezek tapawutlandy. 4 goluň bolsa ýardam pasyny berdi.