UEFA-nyň Çempionlar ligasynda garaşylmadyk netije gazanyldy. Ispaniýanyň “Wilýarreal” topary Germaniýanyň, has dogrusy, soňky ýyllaryň güýçli toparlaryndan “Bawariýa” toparyny Çempionlar ligasyndan çykarmagy başardy.
Mälim bolşy ýaly, bu toparlaryň arasyndaky ilkinji duşuşykda “Wilýarreal” topary öz meýdançasynda “Bawariýany” 1:0 hasabynda ýeňipdi. Jogap duşuşygynda bolsa, “Bawariýa” 1:0 hasabynda öňe geçen hem bolsa, “Wilýarreal” 88-nji minutda hasaby deňläp, ýarym finala çykmagy başardy.
“Bawariýa” toparyndan duşuşygyň 52-nji minutynda Lewandowski tapawutlandy. “Wilýarreal” toparyndan bolsa, Samu Çukwueze 88-nji minutda tapawutlandy.
Şeýlelikde, Çempionlar ligasynyň şu möwsüminde “Wilýarreal” topary garaşylmadyk netijeleri gazanýar. Mundan 16 ýyl ozal, bu topar Çempionlar ligasynda oňat netije görkezipdi. 2005/06 möwsüminde ýarym finala çykypdy.