Paýtagtymyz Aşgabatda ştab-kwartirasy ýerleşýän Birleşen Milletler Guramasynyň Merkezi Aziýa üçin öňüni alyş diplomatiýasy boýunça sebit merkezi tarapyndan 2020-nji ýylyň jemlerine bagyşlanan metbugat ýygnagy geçirildi.
Oňa ýurdumyzyň köpçülikleýin habar beriş serişdeleriniň wekilleri bilen bir hatarda Türkmenistanda işleýän daşary ýurtly köpçülikleýin habar beriş serişdeleriniň wekilleri gatnaşdylar. Şeýle hem bu ýygnaga Merkezi Aziýadan we Owganystan Yslam Respublikasyndan 23 habarçy onlaýn tertipde gatnaşdy.
Metbugat ýygnagynda BMG-niň Merkezi Aziýa üçin öňüni alyş diplomatiýasy boýunça sebit merkezi ýolbaşçysy, BMG-niň Baş sekretarynyň ýörite wekili Natalýa German çykyş etdi. Ol öz çykyşynda 2020-nji ýylyň jemleri jemledi. Hususan-da, Türkmenistanda 2020-nji ýylyň hemişelik Bitaraplygyň 25 ýyllyk şanly baýramçylygynyň astyndan geçendigini belledi. Bu şanly baýramçylygyň BMG-niň döredileniniň 75 ýyllygy bilen gabat gelmeginiň hem uly ähmiýete eýe bolandygyny belläp geçen Natalýa German geçen ýylyň ýeňil ýyl bolmandygyny, dünýäniň köp ýurdunda koronawirus ýokanjyna garşy aýgytly göreşiň alnyp barlandygyny belledi.
Natalýa German 2020-nji ýylyň BMG-niň Merkezi Aziýa üçin öňüni alyş diplomatiýasy boýunça sebit merkezi üçin hem netijeli ýyllaryň biri bolandygyny aýtdy. Hususan-da, Merkezi Aziýa sebitindäki ýurtlaryň arasynda ulag-aragatnaşyk babatda strategik taýdan ähmiýetli ýükleriň geçirilmegine mümkinçilik döredilendigini, elektrik energiýasy, tebigy gaz eksport ugurlarynyň hem dowam etdirilendigini belledi.
Merkez tarapyndan Merkezi Aziýa we Owganystan Yslam Respublikasynyň daşary syýasat edaralarynyň ýolbaşçylygynda onlaýn duşuşyklaryň geçirilip, olarda özara bähbitli hyzmatdaşlyk gatnaşyklarynyň dowam etdirilmegi babatda oňyn netijeleriň gazanylandygy bellenildi.
Şeýle hem geçen ýylyň dekabrynda Merkezi Aziýanyň zenan ýolbaşçylarynyň arasynda özboluşly dialogyň ýola goýlandygyny bellän Natalýa German, ýylyň esasy wakasynyň 12-nji dekabrda geçirilen “Bitaraplyk syýasaty we onuň halkara parahatçylygy, howpsuzlygy we durnukly ösüşi üpjün etmekde ähmiýeti” atly Halkara maslahatynyň uly ähmiýete eýe bolandygyny belledi. Bu maslahatyň jemleýji resminamasynyň BMG agza döwletleriň arasynda resmi taýdan ýaýradylmagynyň we şol resminamada BMG-niň Merkezi Aziýa üçin öňüni alyş diplomatiýasy boýunça sebit merkeziniň ornunyň bellenip geçilmeginiň uly waka bolandygy aýdyldy.
Bulardan başga-da, Birleşen Milletler Guramasynyň Baş Assambleýasynyň 2019-njy ýylyň 12-nji sentýabrynda Türkmenistanyň başlangyjy boýunça 2021-nji ýyly Halkara parahatçylyk we ynanyşmak ýyly diýip yglan etmeginiň esasynda BMG tarapyndan onuň ähli düzümlerine we edaralaryna bu ýylyň ähmiýeti babatda dürli çäreleri guramak babatda düşündiriş işleriniň geçirilendigini bellän Natalýa German BMG-niň Merkezi Aziýa üçin öňüni alyş diplomatiýasy boýunça sebit merkeziniň bu metbugat ýygnagynyň hem Halkara parahatçylyk we ynanyşmak ýylynyň ilkinji çäreleriniň biri bolup durýandygyny uly buýsanç bilen belledi.
Dünýäde bolup geçýän wakalardan habarly bolmak-bu döwrüň talaby!
