“Awaza” milli syýahatçylyk zolagynda geçirilen Merkezi Aziýanyň döwlet Baştutanlarynyň konsultatiw duşuşygyndan soňra habarçylara ýüzlenme bilen çykyş edildi.
Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow metbugat konferensiýasynda eden çykyşynda Merkezi Aziýa döwletleriniň Baştutanlarynyň duşuşygynyň sebitde hyzmatdaşlygyň has-da ösdürilmeginde möhüm tapgyr bolup durýandygyny belledi.
TEBIGY GAZ EKSPORTY
Konsultatiw duşuşykda sebit ykdysadyýetini ösdürmäge degişli meseleler bilen bir hatarda energetika ulgamyndaky hyzmatdaşlyk ara alnyp maslahatlaşyldy. Şonda türkmen tarapy birek-birege peýdaly şertlerde, Türkmenistandan Merkezi Aziýa ýurtlaryna ýa-da sebitlerden daşary bazarlara tebigy gaz üpjünçiliginiň mukdaryny ep-esli ýokarlandyrmaga taýýardygyny mälim etdi.
ULAG ULGAMYNDA HYZMATDAŞLYK
Şeýle hem konsultatiw duşuşykda ulag ulgamyndaky hyzmatdaşlyga hem üns berildi. Bu babatda Türkmenistanyň Prezidentiniň integrirlenen ulag ulgamyny döretmek baradaky teklibi gyzgyn garşylandy.
Türkmen tarapy Hazar deňzindäki Türkmenbaşy halkara deňiz portunyň kuwwatlygyndan Merkezi Aziýa ýurtlarynyň peýdalanmagyna mümkinçilik döretmäge taýýardygy belläp geçdi.
MERKEZI AZIÝANYŇ IŞEWÜRLER GEŇEŞINI DÖRETMEK
Merkezi Aziýa ýurtlaryň arasynda söwda-ykdysady gatnaşyklaryň ösdürilmegi babatda türkmen tarapy Merkezi Aziýanyň Işewürler geňeşini döretmek barada teklip bilen çykyş etdi. Bu başlangyç sebitiň ykdysady we telekeçilik işjeňligini artdyrmaga giň mümkinçilikler döreder.
SAGLYK ULGAMYNDA SEBIT MERKEZINI DÖRETMEK
Duşuşykda Merkezi Aziýanyň döwlet Baştutanlary koronawirus ýokanjyna garşy göreşmek babatda hem pikir alyşdylar.
Saglyk ulgamyndaky hzymatdaşlyk babatda Türkmenistan tarapy Merkezi Aziýanyň ylmy diplomatiýa ugry boýunça lukmançylyk jemgyýetçilikleriniň arasyndaky hyzmatdaşlygyň işjeňleşdirilmeginiň maksadalaýyk boljakdygyny belläp geçdi.
Bu babatda türkmen tarapy Merkezi Aziýada Epidemiologiýa, wirusologiýa we bakteriologiýa sebit merkezini döretmegiň has möhüm bolup durýandygyny teklip etdi.
Bulardan başga-da, konsultatiw duşuşygyň çäklerinde Merkezi Aziýanyň ekologiýa ýagdaýyny gowulandyrmaga degişli meseleler hem ara alnyp maslahatlaşyldy.
Awaza: Täjigistanyň Prezidenti Hormat nyşany bilen sylaglandy