Şu gün – 7-nji aprelde Türkmenistanda, asylly däbe görä, Bütindünýä saglyk güni bellenilýär. Milli senenamamyzda orun alan bu halkara çärä bagyşlanyp, köpçülikleýin welosipedli ýöriş geçirildi. Oňa hormatly Prezidentimiz Serdar Berdimuhamedow gatnaşdy. Bu barada “Türkmenistan” gazetiniň elektron görnüşinde habar berilýär.
Ir bilen paýtagtymyzdaky «Welosiped» binasynyň ýanynda döwlet Baştutanymyz köpçülikleýin welosipedli ýörişe badalga berdi. Arkadagly Serdarymyzyň göreldesine eýerip, ýörişe gatnaşyjylar agzybirlik bilen herekete başladylar.
Ýokary ruhubelentlikde badalga alan köpçülikleýin welosipedli ýörişiň geçirilýän ýolunyň ugry boýunça sungat ussatlarynyň aýdym-saz we tans toparlarynyň çykyşlary guraldy. Ýaz paslynyň jana tenekar howasy, paýtagtymyzyň giň şaýollaryna bezeg berýän çüwdürimlerdir dürli görnüşli güller, sungat ussatlarynyň ajaýyp owazlary ýörişe gatnaşyjylara ruhubelentlik paýlady.
Aşgabat şäheriniň esasy köçeleri boýunça guralan köpçülikleýin çäre ýurdumyzyň Baş meýdançasynyň ýanynda tamamlandy.
Şu sene mynasybetli şu gün ir säher saglyk ýoluna hem köpçülikleýin ýöriş guraldy. Paýtagtymyzda we welaýatlarda «Saglygym — baş baýlygym» şygar astynda bedenterbiýe-sport we sagdyn durmuş çäreleri, ýaryşlar hem-de görkezme çykyşlary giňden ýaýbaňlandyryldy.
Ýeri gelende bellesek, Türkmenistanyň başlangyjy bilen 3-nji iýunyň Bütindünýä welosiped güni diýlip yglan edilmegi hem-de şu ýylyň 15-nji martynda ýurdumyzyň başlangyjy bilen BMG-niň Baş Assambleýasynyň 76-njy sessiýasynyň 61-nji mejlisinde «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek» atly Kararnamanyň biragyzdan kabul edildi. Munuň özi ýurdumyzyň sporty we bedenterbiýe-sagaldyş hereketini ösdürmekde gazanýan üstünliklerine halkara bileleşik tarapyndan ýokary baha berilýändiginiň we ykrar edilýändiginiň aýdyň subutnamasydyr.
Türkmenistanyň Prezidenti Žirinowskiniň aradan çykmagy zerarly gynanç bildirdi