Belarusyň Premýer-ministri Aleksandr Turçin Türkmenistana amala aşyran iş saparynyň dowamynda Türkmenistanyň Prezidenti Serdar Berdimuhamedow bilen duşuşdy diýip, BELTA habarlar gullugynyň habarçysy habar berýär.
Belarus-türkmen gatnaşyklary berk dostluga, özara hormat goýmaga we hyzmatdaşlyga esaslanýar. Belarus iki ýurduň we halklaryň bähbitleri ugrunda Türkmenistan bilen gatnaşyklaryň işjeň ösdürilmegine gyzyklanma bildirýär. Ýurtlar halkara guramalaryň çäklerinde biri-birine özara goldaw berip, netijeli hyzmatdaşlyk edýärler.
Ynsanperwer ulgamda bilim ugrundaky gatnaşyklar aýratyn ähmiýete eýedir. Belarusyň uniwersitetlerinde Türkmenistandan köp sanly talyp bilim alýar. Belarus Türkmenistan üçin dürli ugurlarda ýokary hünärli hünärmenleri taýýarlaýar. Bu bolsa, şol bir wagtyň özünde, söwda-ykdysady hyzmatdaşlygy ösdürmek üçin täze ugurlary we mümkinçilikleri açýar.
Özara söwdanyň ösmegi üçin uly mümkinçilikler bar. Geljegi uly ugurlaryň hatarynda agrosenagat we ulag-infrastruktura ulgamlary bar.
Belarusyň hökümet baştutany Garaşsyz Döwletleriň Arkalaşygynyň (GDA) Hökümet Baştutanlarynyň Geňeşiniň mejlisine gatnaşmak üçin Türkmenistana iş sapary bilen geldi. Geňeşiň mejlisi 22-nji maýda Aşgabatda kiçeldilen we giňeldilen düzümde geçiriler. Mejlisiň jemleri boýunça wekiliýetleriň baştutanlary jemleýji resminamalara gol çekerler.