Tatarystanda saparda bolýan türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Yslam Hyzmatdaşlyk Guramasyna agza ýurtlaryň medeniýet ministrleriniň maslahatyna gatnaşdy. Bu barada Tatarystanyň Baştutanynyň metbugat gullugy habar berýär.
Maslahat Kazanyň merkezi binasynda geçirildi. Russiýanyň medeniýet ministri Olga Lýubimowa, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow, ISESKO-nyň baş direktory Salim bin Mohammed Al-Malik we başgalar dabaranyň hormatly myhmanlary boldular.
Türkmenistanyň Halk Maslahatynyň Başlygy “KazanForum”yň çäklerindäki halkara çärelerine gatnaşmaga berlen çakylyk üçin minnetdarlyk bildirdi. Milli Liderimiz bu forumyň her ýyl dünýäniň dürli ýurtlaryndan we halkara guramalaryndan ýokary derejeli wekiliýetleri öz meýdançasynda jemleýändigini hem-de ugurlaryň iň giň gerimi boýunça hyzmatdaşlygy ösdürmek üçin şertleri döredýändigini nygtady.
«Global transformasiýanyň häzirki zaman şertlerinde özboluşlylygyň we däp-dessur gymmatlyklarynyň esasynda medeni dürlüligi saklap galmak aýratyn ähmiýete eýe bolýar. Şunuň bilen baglylykda, halkara guramalarynyň işi, olaryň döwletleriň durmuş ulgamyndaky tagallalaryny birleşdirmekdäki orny aýratyn ähmiýet gazanýar. Bu ugurda Türkmenistanyň ynsanperwer gymmatlyklary gorap saklamakda hem-de baýlaşdyrmakda, ylymda, bilimde we medeniýetde gazanylanlary goldamakda we ilerletmekde giň hem-de netijeli hyzmatdaşlyga ýardam berýän abraýly halkara guramasy hökmünde ISESKO-nyň işine ýokary baha berýär» diýip, türkmen halkynyň Milli Lideri belledi.
Şeýle hem Türkmenistanyň Halk Maslahatynyň Başlygy 2026-njy ýylda Kazan şäherine yslam dünýäsiniň medeni paýtagty derejesiniň berilmegi bilen Tatarystan Respublikasynyň we Russiýa Federasiýasynyň ýolbaşçylaryny gutlady.