«Türkmennebit» döwlet konserni boýunça soňky wagtlar ýokary çuňlukdaky guýular gazylyp, olardan önüm alynmaga başlandy ― diýip, «Balkan» gazeti habar berýär.
Ştangaly nasoslaryň ulanyş çuňlugy 2500 metrden geçmeýär. Guýynyň gazylyş gyşarmasy bu nasosyň ulanyş çägini azaldýar. Elektrik motory bilen işleýän nasoslaryň ulanyş çuňluklary 3500-4000 metrden geçmeýär. Şeýle çuňluga goýberilýän kabelleriň örtügini nebitiň düzümindäki ýeňil gazlar zaýalap hatardan çykarýarlar.
Halkara nebit we gaz uniwersitetiniň hem-de onuň Balkanabat bölüminiň professor mugallymlary agzalan meseläniň çözgüdiniň bir görnüşini işläp düzdüler we oňa Türkmenistanyň 655 belgili oýlap tapyşlygyň çäklendirilen patenti alyndy.
Bu enjamyň iş kadasy guýynyň çuňlugyna, temperaturasyna we gyşyk gazylmagyna bagly däldir. Nazary taýdan esaslandyrylsa-da, oýlanyp tapylan nasosyň işlemäge ukyply bolan nusgasyny ýasamak zerur. Bu meseläni çözmekligi Mary şäherindäki «Tilsimat» jemagat hojalygy öz üstüne aldy. Häzirki wagtda zerur bolan enjamlary we materiallary toplamak işleri alnyp barylýar.