Täjigistanyň «Howar» milli habarlar agentliginiň habar bermegine görä, 7-nji iýulda Duşanbe şäherinde Täjigistan — Türkmenistan işewürlik geňeşiniň mejlisi geçirildi. Bu duşuşyk iki döwletiň maýa goýum we ykdysady mümkinçiliklerini tanyşdyrmak, şeýle hem “B2B” formatyndaky işewürlik gepleşiklerini geçirmek üçin platforma boldy. Mejlise Täjigistanyň Söwda-senagat edarasynyň başlygy Farhodşoh Rahmonali we Türkmenistanyň Söwda-senagat edarasynyň başlygy Mergen Gurdow bilelikde başlyklyk etdiler.
Täjigistanyň Söwda-senagat edarasynyň berýän maglumatyna görä, duşuşyga Türkmenistanyň 35-den gowrak ygtyýarly wekili, şol sanda döwlet edaralarynyň we hususy pudagyň giň gerimli wekilleri, şeýle hem Türkmenistanyň 20 sany öňdebaryjy kompaniýasynyň we kärhanasynyň ýolbaşçylary hem-de wekilleri gatnaşdy.
Täjigistan tarapyndan bolsa mejlise Ykdysady ösüş we söwda, Oba hojalygy, Senagat ministrlikleriniň, Maýa goýumlar we döwlet emlägini dolandyrmak, Syýahatçylygy ösdürmek boýunça döwlet komitetleriniň hem-de Gümrük gullugynyň wekilleri, Sugd we Hatlon welaýatlarynyň söwda-senagat edaralarynyň ýolbaşçylary, şeýle hem ýurduň hususy pudagynyň giň gerimli wekilleri, şol sanda palatanyň agzalary gatnaşdylar.
2026-njy ýylyň başynda özara haryt dolanyşygynyň ep-esli — iki esseden gowrak artandygy bellenilip, duşuşykda Aşgabat ile Duşanbe hyzmatdaşlygynyň ykdysady we senagat mümkinçilikleriniň heniz doly ulanylmaýandygy we çuňňur diwersifikasiýalaşdyrylmagy talap edýändigi bellenildi.
Türkmenistan bilen Täjigistanyň arasyndaky haryt dolanyşygy ösýär
Günüň tertibindäki esasy meseleleriň biri söwda gatnaşyklaryny ösdürmegiň geljegini ara alyp maslahatlaşmak boldy.
“Özara söwdanyň okgunly ösüşi Täjigistanyň we Türkmenistanyň işewür wekilleriniň hyzmatdaşlygy ösdürmäge bolan uly gyzyklanmasyny tassyklaýar. 2025-nji ýylyň netijeleri boýunça ýurtlaryň arasyndaky daşary söwda dolanyşygynyň möçberi 17% ýokarlandy. 2026-njy ýylyň ýanwar-aprel aýlarynda bolsa haryt dolanyşygy geçen ýylyň degişli döwri bilen deňeşdirilende 2,2 esse ýokarlandy” — diýip, Farhodşoh Rahmonali belledi.
Täjigistanyň eksportynyň esasyny alýumin profilleri emele getirýär, Türkmenistandan bolsa adaty bolşy ýaly, ýokary hilli nebit önümleri, plastmassa we gurluşyk serişdeleri import edilýär.