Ösümlikler diňe bir öýüňize bezeg bermän, eýsem siziň saglygyňyz üçin hem alada edýär. Öýüň içiniň howasyndaky zyýanly maddalaryň ýok edilmegine kömek edýär. Şeýle hem otag güllerine ideg etmek adamda ýakymly duýgulary döredýär.
Beýik Britaniýanyň Birmingem we Reding uniwersitetleriň alymlar topary bu ugurda ylmy-barlag işlerini geçirdiler. Olaryň ylmy-barlaglary “Journal of Air Quality” žurnalynda çap edildi. Ylmy-barlaglaryň netijelerine görä, otag ösümlikleri içerdäki howanyň hilini ep-esli ýokarlandyrýandygyny görkezýär.
Ylmy-barlaglara laýyklykda, otag ösümlikleri ýa-da gülleri otagyň içindäki dürli dem alyş keselleriniň döremegine sebäp bolup bilýän azot dioksidiniň möçberini ep-esli azaltmaga giň mümkinçilik berýär.
Bu ylmy-barlagda alymlar topary drasena, liliýa we paporotnik güllerini saýlap aldylar. Bu ösümlikler köp adamlaryň öýlerinde giňden ulanylýar we ösdürilip ýetişdirilýär. Her bir ösümlik ýörite gutujyga ýerleşdirilip, şol gutujykda hem azot diosidiň hem adaty öýde ýa-da ýapyk binada bolup biläýjek derejede azot dioksid möçberi bar. Bir sagadyň dowamynda ösümlik zyýanly gazyň ýarysyny diýen ýaly özüne çekip aldy.
Alymlar 15 inedördül metr meýdany bolan ofis otagyna 5 ösümlik ýerleşdirmegiň ýeterlikdigini belleýärler. Howa çalşygy pes bolsa-da, bu ösümlikler zyýanly gazlaryň derejesini 20 göterim azaldyp biler.