Meşhur, ady rowaýata öwrülen amerikaly boksçy Maýk Taýsonyň şu ýylyň 12-17-nji noýabrynda Özbegistanyň Daşkent şäherinde geçiriljek Bütindünýä boks assosiasiýasynyň ýyllyk mejlisine myhman hökmünde gatnaşmagyna garaşylýar.
Özbek neşirleriniň habar bermegine görä, Bütindünýä boks assosiasiýasynyň mejlisi boks dünýäsiniň iri halkara çäreleriniň biridir. Onda sportuň bu görnüşini ösdürmek babatdaky meseleler ara alnyp maslahatlaşylýar. Şeýle hem dürli seminarlar, sergiler we baýrak gowşurylyş dabaralary guralýar.
Mejlise milli boks federasiýalaryň wekilleri, tälimçiler hem-de belli boksçular gatnaşýar. Şeýle hem 17-nji noýabrda ajaýyp boks agşamlarynyň birini geçirmek meýilleşdirilýär.
Maýk Taýson – agyr agramda absolýut dünýä çempiony. Ol boks boýunça WBC, WBA, IBF derejeleriniň eýesidir. Maýk Taýson özüniň boks tutluşygyndaky ugry bilen “Demir Maýk” adyny alan meşhur türgenleriň biridir.