Gyrgyz Respublikasynyň Prezidenti Sadyr Žaparow Türkmenistanyň Prezidenti Serdar Berdimuhamedowyň çakylygy boýunça 11-nji oktýabrda Aşgabatda iş saparynda bolar.
Gyrgyzystanyň Prezidenti Sadyr Žaparow Aşgabatdaky saparynyň çäklerinde Magtymguly Pyragynyň doglan gününiň 300 ýyllygyna bagyşlanan “Döwürleriň we siwilizasiýalaryň özara arabaglanyşygy — parahatçylygyň we ösüşiň binýady” atly halkara foruma gatnaşar. Bu barada Gyrzgystanyň Prezidentiniň Diwanynyň daşary syýasat bölüminiň başlygy Muratbek Azymbakiýew habar berdi.
– Aşgabatdaky halkara foruma Merkezi Aziýanyň we beýleki döwletleriň Prezidentleri gatanaşar. Öňde boljak forum türkmen şahyry we akyldary Magtymguly Pyragynyň doglan gününiň 300 ýyllygyna bagyşlanyp, döwletleriň arasyndaky medeni-ynsanperwer hyzmatdaşlygy pugtalandyrmaga gönükdirilendir – diýip, Muratbek Azymbakiýew belledi.
Paýtagtymyz Aşgabatda geçiriljek halkara foruma Russiýanyň, Mongoliýanyň, Gyrgyzystanyň, Ermenistanyň Prezidentleriniň, Türkiýäniň Mejlisiniň Başlygynyň we beýleki döwletleriň ýokary derejeli wekiliýetleriniň gatnaşmagyna garaşylýar.