Russiýa Federasiýasynyň Hökümetiniň Başlygy Mihail Mişustiniň ýolbaşçylygyndaky wekilçilikli topar Türkmenistanda saparda bolar. Bu saparyň şu ýylyň 19-20-nji ýanwarynda amala aşyrylmagy göz öňünde tutulýar.
Rus neşirleriniň habar bermegine görä, ýurduň Premýer-ministri Mişustiniň ýolbaşçylygyndaky wekiliýetiň Aşgabatda geçiriljek türkmen-rus işewürlik forumyna gatnaşmagy göz öňünde tutulýar.
Forumyň çäklerinde bilelikdäki işewürlik duşuşyklary meýilleşdirilýär. Ulag-logistika, bilim, senagat, sanlylaşdyrmak ýaly ugurlarda işewürlik gepleşikleri geçiriler.
Işewürlik forumynyň birinji gününde iki ýurduň hususy pudagynyň wekilleriniň arasynda B2B görnüşinde duşuşyklar meýilleşdirilýär.
Mundan başga-da, bu forumyň çäklerinde rus öndürijileriň söwda-sergi meýdançasy bolan “Russiýanyň Söwda öýüniň” açylmagy hem-de ikitaraplaýyn resminamalara gol çekmek maksat edinilýär.
Forum, Türkmenistan bilen Russiýanyň arasyndaky söwda, ykdysady we senagat hyzmatdaşlygyny çuňlaşdyrmaga gönükdirilendir.
Mihail Mişustin 2020-nji ýylyň 16-njy fewralynda Russiýa Federasiýasynyň Hökümetiniň Başlygy wezipesine bellendi. Ol Türkmenistana Russiýanyň Premýer-ministri wezipesinde ilkinji saparyny amala aşyrýar.