«Awaza» milli syýahatçylyk zolagynda «Awaza — dostluk mekany» atly halkara tans we folklor festiwaly geçirilýär. Türkmenistanyň Medeniýet ministrligi, Daşary işler ministrligi we Balkan welaýat häkimligi tarapyndan guralan çärä Eýrandan, Hindistandan, Täjigistandan, Özbegistandan medeniýet we sungat işgärleri we ýurdumyzyň medeniýet we sungat ussatlary gatnaşdylar.
Festiwalyň çäklerinde akwaparkyň sahnasynda bilelikdäki konsert geçirildi. Tomaşaçylar dünýäniň dürli ýurtlaryndan gelen tans toparlaryny mähirli garşy aldylar. Olaryň käbirleri ýurdumyzda geçirilen halkara medeni çärelere ençeme gezek gatnaşdylar. Sahnada dürli halklaryň saz sungatynyň köpöwüşginliligi öz beýanyny tapdy, milli aýdymlar ýerine ýetirildi we gadymdan gelýän däpleriň özboluşlylygy şöhlelendirildi.
Halkara festiwalyň çäklerinde «Daýanç» sagaldyş we dynç-alyş merkeziniň mejlisler zalynda «Küştdepdi — parahatçylyk waspçysy» atly halkara maslahatyň geçirilmegi göz öňünde tutuldy.
«Küştdepdi» milli aýdym we tans dessurynyň özboluşlylygy hem-de gadymylygy göz öňünde tutulyp, ol 2017-nji ýylda ÝUNESKO-nyň Adamzadyň maddy däl medeni mirasynyň sanawyna girizildi. Çünki bu tans geçmişi we şu güni, şeýle hem dürli medeniýetleriň wekillerini birleşdirýän özboluşly durmuşy mazmuna eýedir.
Üç günüň dowamynda döredijilik duşuşyklary we tans sungaty boýunça ussatlyk sapaklary geçirildi. Her agşam halk döredijilik, folklor-etnografik toparlary çykyş edip, öz halkynyň milli sungatyny görkezdiler.
Myhmanlar üçin «Awaza» milli syýahatçylyk zolagynyň taryhy bilen tanyşmagy we gämide gezelenç etmegi öz içine alýan medeni maksatnama taýýarlanyldy.